Daryo.uz internet nashrida "Farmakologlar “Favipiravir” preparati muvozanatning buzilishiga olib kelishi mumkinligini maʼlum qildi. Undan O‘zbekistonda COVID-19 bemorlarini davolashda qo‘llanilmoqda" nomli maʼqola eʼlon qilingan edi.

Maqolada, "Rossiyada COVID-19 bilan kasallangan bemorlarni davolash uchun qo‘llanilayotgan “Favipiravir” preparati borasida ijtimoiy tarmoqlarda mulohazalar paydo bo‘ldi. Fikrlar nuqtai nazaridan “Favipiravir” preparati yiqilishni keltirib chiqaruvchi nospetsifik muvozanat buzilishlariga olib kelishi mumkin”ligi hamda "O‘zbekiston Sog‘liqni saqlash vazirligi esa 6 oktyabr kuni COVID-19‘ga chalingan bemorlarni davolashda “Favipiravir” dori vositalaridan foydalanilayotganligini maʼlum qilgan"ligi haqida aytib o‘tilgan.

Ushbu fikrlar yuzasidan O‘zbekiston Respublikasi Sog‘liqni saqlash vazirligi huzuridagi Farmatsevtika tarmog‘ini rivojlantirish agentligining Dori vositalari, tibbiy buyumlar va tibbiy texnika ekspertizasi va standartlashtirish davlat markazi tomonidan munosabat bildirildi.

Har bir dori vositasining qo‘llanish qog‘ozida o‘ziga xos tavsiyalar va ogohlantirishlar bo‘ladi. “Favipiravir” preparatini qo‘llash uchun ham o‘z qo‘llanma hujjati bor.

Favipiravir - bu har xil turdagi RNK viruslariga, shu jumladan SARS-CoV-2  koronavirusiga qarshi antiviral preparat sifatida ishlatiladigan kimyoviy modda.

Preparat Yaponiyada yuqori virusli yuk tufayli kelib chiqqan og‘ir infeksiyalarga qarshi ishlatiladigan grippga qarshi dori sifatida ishlab chiqilgan va tasdiqlangan. U Yapon bozorida “Avigan” savdo nomi ostida muomalada bo‘lgan.

Maqolada aytilgan «Tadqiqot mualliflarining taʼkidlashicha, muvozanat buzilishlari haqida favipiravir taʼsir ko‘rsatuvchi moddaga ega “Avigan” preparatiga qo‘llanmani qayta ko‘rib chiqqan Yaponiyaning dori vositalari bo‘yicha agentligining xulosalarida aytilgan. Agentlik xulosasida, nojo‘ya taʼsirlar qatorida, to‘satdan yugurish ham qayd etilgan» fikrlariga kelsak, hozirgacha O‘zbekistonda bemorlarga “Favipiravir” preparatini qo‘llashda jiddiy nojo‘ya holatlari uchramadi.

Dori vositalarining qo‘llanilishi chog‘ida nojo‘ya reaksiyalar aniqlangan holatda kimga va qanday tartibda murojaat qilish kerak?

Maʼlumot o‘rnida, Sog‘liqni saqlash vazirligining 2018 yil 9 martdagi 13-sonli “Dori vositalarini qo‘llashda aniqlangan nojo‘ya taʼsirlar to‘g‘risida xabardor qilish tartibi to‘g‘risidagi nizomni tasdiqlash to‘g‘risida”gi buyrug‘iga binoan, nojo‘ya taʼsir yuzaga kelgan taqdirda, aniqlangan holat to‘g‘risida belgilangan muddatda yozma xabarnoma tayyorlanishi va yuborilishi kerak.

Shifokor bemorda jiddiy nojo‘ya taʼsir (anafilaktik taʼsir, Layell sindromi yoki Stivens-Jonson sindromi shuningdek, odamning o‘limi) holatlari aynan ushbu dorini qo‘llash oqibatida vujudga kelganligi to‘g‘risida xulosa chiqargan holda, bu haqda 1 kun ichida xabarnoma rasmiylashtiriladi.

Boshqa barcha holatlarda, kuzatilgan yoki aniqlangan nojo‘ya taʼsir, shuningdek qo‘llanilgan dorilarning samaradorligi yo‘qligi to‘g‘risida 10 kun ichida xabar berish kerak. Nojo‘ya taʼsir aniqlangan taqdirda, xabarnoma kartasini to‘ldirish kerak.

Xabarnoma yuborish uchun siz xabarnoma kartasi shaklini yuklab olishingiz va to‘ldirishingiz kerak (dori vositalarining nojo‘ya taʼsiri, jiddiy nojo‘ya taʼsiri va dorilarning samaradorligi yo‘qligi haqida xabarnoma kartasi shakli).

Word shaklida to‘ldirilgan xabarnoma kartasi shakllari quyidagi elektron manzilga - farmkomitet@minzdrav.uz yoki quyidagi manzilga - 100002, Toshkent sh., Ozod ko‘chasi, K. Umarov tor ko‘chasi, 16-uy jo‘natilishi kerak.

Eslatib o‘tamiz, har bir dori vositasini shifokor ko‘rsatmasi va retsepti, hamda nazoratida olishni unutmang. Va har bir dorining o‘z nojo‘ya taʼsirlari kuzatilishi mumkin.

Hozirgi vaqtgacha O‘zbekiston Respublikasi Sog‘liqni saqlash vazirligining Farmakologiya qo‘mitasiga “Favipiravir” preparatini qo‘llash oqibatida kuzatilgan nojo‘ya taʼsirlar haqida maʼlumot kelib tushmagan.

Farmatsevtika tarmog‘ini rivojlantirish agentligi Matbuot xizmati