O‘zbekiston Respublikasi Sog'liqni saqlash vazirligi Farmatsevtika tarmogʻini rivojlantirish agentligi
Ру O`z Ўз En

O'zR Farmakopeyasi

O'zR Farmakopeyasi

Davlat farmakopeyasi

07.02.2022 O‘zbekiston Respublikasi Davlat farmakopeyasi tahririyat kengashi Sizlarga O‘zbekiston Respublikasi Sog‘liqni saqlash vazirligining 2021 yil 28 dekabrdagi 304-son “O‘zbekiston Respublikasi Davlat farmakopeyasini tasdiqlash to‘g‘risida”gi buyrug‘iga binoan Davlat farmakopeyasini 1-nashri 2-jildi tasdiqlanganini ma’lum qiladi. Quyida O‘zbekiston Respublikasi Davlat farmakopeyasi 2-jildini ishlab chiqishning dolzarbligi, undan kutilgan maqsad va o‘z yechimini topayotgan vazifalar, shuningdek, Davlat farmakopeyasi 1-nashri 2-jildining tuzilishi, tarkibi va undan foydalanishda e’tiborni qaratish kerak bo‘lgan yo‘nalishlar bo‘yicha umumlashtirilgan ma’lumotlar taqdim etilmoqda.

Davlat farmakopeyasi dori vositalariga va tibbiy buyumlarga doir talablarni, umumiy farmakopeya maqolalarini, farmakopeya maqolalarini, dori vositalarining va tibbiy buyumlarning sifatini nazorat qilish usullarini o‘z ichiga olgan hujjatlar to‘plami bo‘lgan rasmiy nashrdir.

Umumiy farmakopeya maqolasi dori vositalarining, tibbiy buyumlarning sifatiga, dorivor o‘simlik xom ashyosiga, ularning sifatini nazorat qilish usullariga, dori vositalarining sifatini nazorat qilishda foydalaniladigan standart namunalarga, reaktivlarga, dori vositalarini ishlab chiqarishda foydalaniladigan joylash-o‘rash materiallariga qo‘yiladigan umumiy talablarni belgilaydi.

Farmakopeya maqolasi muayyan dori vositasining, tibbiy buyumning, dorivor o‘simlik xom ashyosining, yordamchi moddaning sifatiga doir talablarni belgilaydi.

Umumiy farmakopeya maqolalarini, farmakopeya maqolalarini ishlab chiqish va ularni Davlat farmakopeyasiga kiritish Farmakopeya qo‘mitasi tomonidan belgilangan tartibda amalga oshiriladi. Farmakopeya qo‘mitasi O‘zbekiston Respublikasi Sog‘liqni saqlash vazirligining rasmiy ekspert organidir.

Davlat farmakopeyasi O‘zbekiston Respublikasi Sog‘liqni saqlash vazirligi tomonidan besh yilda kamida bir marta chop etiladi. Davlat farmakopeyasining qayta nashrlari oralig‘idagi davrda Davlat farmakopeyasiga ilovalar chop etiladi.

Belgilangan matnni tinglash uchun quyidagi tugmani bosing Powered by GSpeech