Шу кунларда Ўзбекистон ва Хитой соғлиқни сақлаш тизими вакилларининг онлайн учрашуви бўлиб ўтди. Учрашувнинг асосий мавзуси - SARS-CoV2 коронавирусига қарши Хитой вакцинасининг учинчи босқичи клиник синовларини ўтказиш имкониятларини ишлаб чиқиш бўйича ҳамкорликни йўлга қўйиш бўлди.

Учрашувда Ўзбекистон томонидан Фармацевтика тармоғини ривожлантириш агентлигининг етакчи мутахассислари, Тошкент вакциналар ва зардоблар илмий-тадқиқот институти ҳамда Санитария-эпидемиологик осойишталик агентлиги раҳбарияти ва мутахассислари, Ўзбекистоннинг Хитойдаги элчихонаси вакиллари иштирок этдилар.

Хитой томонидан Пекин халқаро савдо-иқтисодий компанияси COAG ва Sinopharm корпорацияси раҳбарияти ҳамда етакчи мутахассислари иштирок этдилар.

Учрашув давомида, Хитой томони, Хитой Соғлиқни сақлаш вазирлиги ҳузуридаги Хитой миллий биотехника гуруҳи таркибига кирадиган Ухан биологик маҳсулотлар институти ва Пекин биологик маҳсулотлар институти ҳозирда коронавирус инфекциясига қарши вакцинанинг сўнгги учинчи босқич клиник синовларида эканлигини айтиб ўтди.

Препарат клиник синовларининг биринчи ва иккинчи босқичлари апрель ойининг охирида 1100 дан ортиқ кўнгиллилар иштирокида ўтказилган. Клиник синовлар вакцинанинг “жиддий салбий таъсири” йўқ эканлиги ва унинг хавфсиз эканлигини кўрсатган. Синовда иштирок этган кўнгиллиларнинг барчасида антитаначалар шаклланиши юқори даражадалиги қайд этилган.

Июнь ойида Хитойнинг Миллий дори воситалари маъмурияти Ухан тадқиқотчиларига учинчи босқичга ўтишга рухсат берди. Шунингдек, Хитой томонининг таъкидлашича, ҳозирги пайтда 30га яқин мамлакат уларда клиник синовларнинг учинчи босқичини ўтказишга қизиқиш билдирган ва ҳозирда Хитой томони клиник синовларнинг учинчи босқичи доирасида Бирлашган Aраб Aмирликлари билан яқиндан ҳамкорлик қилмоқда.

Онлайн-учрашув якунида Хитой томони Ўзбекистонда клиник синовларнинг учинчи босқичини ўтказиш имкониятларини кўриб чиқиш ҳамда уларга Ўзбекистон аҳолисининг вакцинага бўлган эҳтиёжи ва шу асосда вакцинани харид қилиш масаласи борасида маълумот тақдим этиш таклифини билдирди.

Ўз навбатида, Ўзбекистон томони клиник тадқиқотлар натижаларини ўрганиш ва келгусидаги ҳамкорлик тафсилотларини муҳокама қилиш учун қўшма Ўзбекистон-Хитой экспертлик гуруҳини тузишни таклиф қилди.

Фармацевтика тармоғини ривожлантириш агентлиги Матбуот хизмати