Фармацевтика тармоғини ривожлантириш агентлиги ҳузуридаги «Дори воситалари, тиббий буюмлар ва тиббий техника экспертизаси ва стандартлаштириш Давлат маркази» ДУК 2022 йил 1 чорак давомида контрафакт, қалбакилаштирилган ва сифатсиз дори воситалари ва тиббий буюмлар юзасидан аниқланган ҳолатлар бўйича маълумот берди.

Ўзбекистон Республикаси ҳуқуқни ҳимоя қилиш идоралари томонидан Давлат марказининг Ҳуқуқни муҳофаза қилиш органлари мурожаатлари билан ишлаш бўлимига 74 та мурожаат хати келиб тушган бўлиб, мазкур мурожаатларга кўра, 41 турдаги контрафакт дори воситалари, 12 турдаги қалбакилаштирилган дори воситалари ва 21 турдаги сифатсиз дори воситалари аниқланган. (Рўйхат билан батафсил бу ерда танишасиз)

Ушбу ҳолатлар бўйича Фармацевтика тармоғини ривожлантириш агентлиги ҳузуридаги Давлат маркази томонидан Ҳуқуқни муҳофаза қилиш органларига тегишли маълумотлар тақдим қилинган.

Эслатиб ўтамиз, Ўзбекистон Республикасининг «Дори воситалари ва фармацевтика фаолияти тўғрисида»ги қонуни 20-моддасидага мувофиқ cифатсиз, қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини харид қилиш, чакана реализация қилиш ва улардан фойдаланиш тақиқланади.

Фармацевтика тармоғини ривожлантириш
агентлиги Матбуот хизмати