Ўзбекистон Республикаси Соғлиқни сақлаш вазирлиги Фармацевтика тармоғини ривожлантириш агентлиги
Ру O`z Ўз En

Фармацевтика тармоғини ривожлантириш агентлиги директори Сардор Кариев Агентлик тизими ходимлари ва соҳа мутахассисларига ҳамда аҳолига мурожаат қилди

Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директори Кариев Сардор Хикматовичнинг Агентлик тизими ходимлари ва соҳа мутахассисларига ҳамда аҳолига мурожаати

Коррупцияга қарши курашиш Янги Ўзбекистонда давлат сиёсатининг энг устувор йўналишига айланиб улгурди. Буни сўнгги йилларда соҳага оид қабул қилинган концептуал аҳамиятга эга норматив-ҳуқуқий ҳужжатлар, коррупцияни олдини олишга қаратилган маъмурий ислоҳотлар мисолида ҳам кўриш мумкин.

Энг аввало, таъкидлаш жоизки, коррупцияга қарши курашнинг сифат ва сон жиҳатдан мутлақо янги даражага кўтарилиши Ўзбекистон Республикаси Президенти Шавкат Мирзиёевнинг сиёсий иродаси маҳсулидир. Жумладан, давлат раҳбарининг жамиятни “ҳалоллик вакцинаси билан эмлаш” зарурияти ҳақидаги фикрларини бу борадаги ишларга қўйилган тамал тоши дейиш лозимдир.

Тараққиётнинг янги босқичига қадам қўяётган Ўзбекистон учун коррупциянинг ҳар қандай шаклдаги кўриниши ислоҳотлар шиддатини сусайтириши билан хавфлидир. Шу боис мамлакатимизда мазкур иллатга қарши кескин ва муросасиз кураш олиб борилмоқда. Барча соҳада норматив-ҳуқуқий базани тизимли равишда такомиллаштириб бориш чоралари кўрилмоқда.

Хусусан, “Коррупцияга қарши курашиш тўғрисида”ги Қонун коррупцияга қарши курашиш соҳасидаги муносабатларни тартибга солиб, унда “коррупция”, “коррупцияга оид ҳуқуқбузарлик”, “манфаатлар тўқнашуви” каби асосий тушунчаларга изоҳ бериш билан бир қаторда, коррупцияга қарши курашишнинг асосий принциплари кўрсатиб берилган.

Мамлакатимизда коррупциянинг олдини олиш ва унга қарши муросасиз курашишнинг илғор халқаро стандартларга асосланган тизимини жорий этиш бўйича изчил чоралар кўрилмоқда.

Хусусан, илк бор коррупциявий хавфларни аниқлаш ва тизимли таҳлил қилиш, уларни келтириб чиқарувчи омилларни бартараф қилиш учун масъул бўлган алоҳида орган – “Коррупцияга қарши курашиш агентлиги” ташкил этилди. Ушбу орган билан ҳамкорликда Агентлигимизда ҳам коррупцияга қарши ички назорат тузилмалари фаолияти йўлга қўйилмоқда.

Коррупцияга қарши ички комплаенс назорати тизими жорий этилиши билан коррупцияга қарши ичкаридан туриб курашилиши, катта салбий оқибатларга олиб келувчи корруцион ҳолатларнинг олди олиниши таъминланади. Натижада, “Касални даволашдан кўра олдини олган маъқул” тамойили амалиётга жорий этилади. Шу муносабат билан, барча давлат органлари ва ташкилотларида коррупцияга қарши ички назорат тузилмалари фаолияти йўлга қўйилиши баробарида, Агентлик марказий аппарати тузилмасида ҳам “Комплаенс, молиявий назорат ва ички аудит хизмати” жорий қилинди.

Қисқа муддатда, Агентлик ва унинг идоравий мансуб ташкилотларида коррупцияга қарши курашиш бўйича 14 тадан ортиқ ички идоравий хужжатлар ишлаб чиқилиб, фаолиятга жорий қилинди.

Бундан ташқари, Агентликда ISO 37001:2016 “Коррупцияга қарши бошқарув тизими” ва ISO 9001:2015 “Сифат менежменти тизими” стандартларини 2022 йилда жорий қилиш бўйича изчил ишлар олиб борилмоқда. Шу мақсадда, дастлабки босқичда, Агентликнинг 5 нафар раҳбар ва ишчи-ходимлари ISO 37001:2016 стандарти бўйича малакасини ошириб, махсус сертификатларга эга бўлдилар. Шунингдек, Агентлик таркибидаги ташкилот ва муассаларда ҳам комплаенс ва ички аудит хизматларини йўлга қўйиш бўйича тегишли ташкилий ва бошқа чора тадбирлар кўрилмоқда.

Бундан ташқари, Агентлик тизимида коррупцияга қарши кураш тамойиллари ҳамда халқаро стандартлар талабига мувофиқ равишда 2021 йил 1 сентябрдан агентлик тизимида мавжуд барча бўш (вакант) лавозимларга малакали мутахассисларни очиқ танлов тамойиллари асосида ишга қабул қилиш амалиёти жорий этилди.

Коррупцияга қарши курашиш Миллий Кенгаши тасдиқлаган “9 декабрь - Халқаро коррупцияга қарши курашиш куни”га бағишланган аксилкоррупцион ҳафталик доирасида Агентликнинг коррупцияга қарши курашиш бўйича ички идоравий хужжатлари билан таништириш, коррупцион холатларнинг мавжудлиги, уларнинг олдини олиш бўйича 2021 йил 3 декабрь куни “Очиқ эшиклар кунлари” тадбири ўтказилган бўлса, 2021 йил 24 декабрда Коррупцияга қарши курашиш агентлиги ва Тошкент шаҳар прокуратураси ходимлари иштирокида коррупцияга қарши курашиш бўйича профилактик тадбир ўтказилди.

Агентликда исталган шахсга ҳуқуқбузарлик ҳолати ҳақида тўғридан-тўғри раҳбариятга ҳабар бериш имконини яратиш мақсадида, жисмоний ва юридик шахсларнинг мурожатларини қабул қилувчи махсус телеграм-бот “-@stop_corruptionbot” фаолияти йўлга қўйилган.

Энди Сиз соҳадаги қонунбузарлик ва коррупция ҳолатларига дуч келсангиз, ушбу “-@stop_corruptionbot” ёки (71) 203-27-77 рақамли “Ишонч телефони” ҳамда соҳага даҳлдор коррупцион ҳолатлар бўйича тўғридан тўғри маълумот қабул қилувчи Агентликнинг “Комплаенс, молиявий назорат ва ички аудит хизмати”га бириктирилган (71) 234-15-58 рақамли телефон орқали бевосита мурожаат қилишингиз мумкин.

Шунингдек, Агентлик тизимида коррупцион холатларнинг мавжудлиги, уларнинг кўринишларига баҳо бериш ҳамда аҳоли фикрини ўрганиш мақсадида Агентликнинг расмий www.uzpharmagency.uz сайтида доимий ишловчи аноним сўровнома ўтказиш бўйича саҳифа жойлаштирилган.

Лекин, ривожланиб бораётган Ўзбекистонимизнинг гуллаб яшнашида Фармацевтика соҳасини тубдан ривожлантириш, ҳалқимизни сифатли дори воситалари ҳамда тиббий буюмлар билан таъминлашда коррупцияга қарши кураш соҳасида салмоқли натижаларга эришиш учун биргина Агентлик ва унинг комплаенс хизмати томонидан эмас, балки, бу иллатга қарши биргаликда кураш олиб бориш билангина кутилган натижаларга эришишимиз мумкин.

Шу боис, Фармацевтика тармоғини ривожлантириш агентлиги тизимидаги барча ходимларни, шунингдек, дори воситалари ҳамда тиббий буюмларни ишлаб чиқариш, етказиб бериш ҳамда улгуржи ва чакана сотиш билан шуғулланувчи барча тадбиркорлик субъектлари ишчи ходимларини ҳамда барча фуқароларимизни қонунийлик, фуқаролар ҳуқуқлари, эркинликлари ва қонуний манфаатларининг устуворлиги, очиқлик ва шаффофлик, тизимлилик, давлат ва фуқаролик жамиятининг ҳамкорлиги, коррупциянинг олдини олишга доир чора-тадбирлар устуворлиги ва ҳар қандай ноқонуний ҳатти-харакатларга нисбатан жавобгарликнинг муқаррарлиги тамойилларига таянган ҳолда коррупцияга нисбатан муросасиз муносабатни шакллантирилиши жараёнларида фаол иштирок этишга чақириб қоламиз.

Сиз Фармацевтика тармоғини ривожлантириш агентлиги тизимида ҳамда фармацевтикага оид соҳада коррупцияга дуч келсангиз, бизга зудлик билан хабар беринг. Ҳар бир мурожаат шахсан Фармацевтика тармоғини ривожлантириш агентлиги директори назорати остида қонунда белгиланган тартибда кўриб чиқилади.

Соғлиқни сақлаш вазирлиги ҳузуридаги
Фармацевтика тармоғини ривожлантириш агентлиги директори
Кариев Сардор Хикматович

Белгиланган матнни тинглаш учун қуйидаги тугмани босинг Powered by GSpeech