Италия фармацевтика компанияси вакили Агентликда

Италиянинг “IBSA Group” компанияси собиқ бизнес ривожлантириш менеджери - Италия-Ўзбекистон савдо палатаси Кенгаши аъзоси билан бўлган учрашув аввалида агентлик директори Абдулла Азизов Фармацевтика тармоғини ривожлантириш агентлиги фаолияти ҳақида маълумот бериб, юртимизда инвестицион лойиҳаларини амалга оширишда мазкур компанияга ўз ваколатлари доирасида кўмаклашишга тайёрлигини маълум қилди.

“IBSA Group” компаниясининг собиқ бизнес ривожлантириш менеджери Италия-Ўзбекистон савдо палатаси Кенгаши аъзоси Марко Фарчи фармацевт кадрларни тайёрлаш ва уларнинг малакасини ошириш мақсадида Ўзбекистонда “Университа Сапиенза ди Рома” университети факултетини ташкил қилиш, талабалар алмашинуви дастурлари ва амалиётларини жорий этиш бўйича ҳамкорлик ўрнатиш таклифини берди.

Марко Фарчининг Ўзбекистон Республикасидаги Италия компаниялари Кенгаши аъзоси эканини ҳисобга олган ҳолда Италиянинг фарммаҳсулотлар ишлаб чиқарувчи истиқболли компаниялари (A. Menarini Industrie Farmaceutiche Riunite SRL, Italfarmaco SpA in Italy, Chemi SpA, Chiesi Farmaceutici ва бошқалар) билан ҳамкорликни йўлга қўйиш, маҳаллийлаштириш бўйича ташаббусларни муҳокама қилиш учун бу компаниялар билан алоқа ўрнатишда амалий ёрдам сўралди.

Маълумот учун: IBSA GROUP — IBSA (Institut Biochimique SA) — 1945-йилда Луганода асос солинган швейцар трансмиллий фармацевтик компаниясидир.IBSA 10 терапевтик гуруҳ: репродуктив тиббиёт, эндокринология, оғриқ ва яллиғланиш, суяк-бўғинлар, эстетик тиббиёт, дерматология, урогинекология, кардиометаболик, респиратор тиббиёт кабиларни қамраб олувчи маҳсулотлар портфелини ўз ичига олади.

Айнан IBSA GROUP жаҳоннинг репродуктив саломатлик бўйича энг йирик операторларидан ҳамда гиалурон кислота асосида маҳсулотларни ишлаб чиқарувчи етакчи компанияларидан саналади. 90 дан зиёд мамлакатда ишловчи IBSA Европа, Хитой ва АҚШда 18 та шўба компанияларга эга.