Ўзбекистон - Туркия: Фармацевтика соҳасида ҳамкорлик муносабатлари

Жорий йил 14-15 март кунлари Фармацевтика тармоғини ривожлантириш агентлиги директори А.Азизов бошчилигидаги экспертлари делегацияси Туркияда бўлиб қайтди.

14 март куни Агентлик делегацияси Истанбул шаҳридаги TOBB биносида "Abdi Ibrahim", "TERRA", "EastFarma", "TISD", "Atabay", "Kocak Farma", "Ali Raif" каби йирик компаниялар вакиллари билан учрашди. Тадбир давомида иштирокчилар юртимиз фармацевтика саноати билан яқиндан танишиб, фармацевтика соҳасини тартибга солиш механизмлари, ҳусусан, фармацевтика бозори, референт нархлар ҳамда инвесторлар учун яратилган имтиёз ва афзалликлар борасида ўзларини қизиқтирган саволларга жавоб олдилар. Учрашув якунига кўра, мулоқотни онлайн тарзда давом эттиришга келишиб олинди.

Шу куни Фармацевтика тармоғини ривожлантириш агентлиги делегацияси вакиллари Туркиянинг “IEIS-Фармацевтика саноати ишлаб чиқарувчилари уюшмаси” билан ҳам учрашиб, Туркия фармацевтика саноатининг бугунги ҳолати билан танишишди ҳамда фармацевтика саноати назорат органларининг халқаро стандартини жорий этиш тажрибасини ўрганишди. Учрашув якунида томонлар бу масалада ўзаро ҳамкорликка келишиб олишди.

Март ойининг самарали ўтган 14-санасидаги тадбирлар Истанбулдаги "Abdi Ibrahim" корхонасининг ишлаб
чиқариш майдонини бориб кўриш билан якунланди. Агентлик вакиллари бу ерда ишлаб чиқаришнинг тўлиқ цикли билан танишдилар ҳамда автоматлаштириш тизимлари ва ишлаб чиқариш механизмлари ҳақида тўлиқ маълумот олдилар. Томонлар ҳамкорлик истиқболларини муҳокама қилар экан, "Abdi Ibrahim" компанияси бозорни батафсил ўрганишдан манфаатдор эканлигини таъкидлаб, яқин орада Ўзбекистонга ташриф буюриш ниятида эканини ҳам маълум қилди.

Маълумот учун: Фармацевтика тармоғини ривожлантириш агентлиги директори А.Азизов 2023 йилнинг декабрь ойида Туркия давлатида бўлиб (https://t.me/Uzpharm_agency/8476), “Abdi Ibrohim” компанияси вакиллари билан музокара олиб борган. 2024 йил 11 январь куни Абдулла Азизов таклифига биноан Туркиянинг йирик фармацевтика компанияси “Abdi Ibrahim”нинг халқаро бозорлар бўйича вица президенти Ko‘ksal Ulgen Ўзбекистонга келган эди. (https://t.me/Uzpharm_agency/8636?single) Шунингдек, “Abdi İbrahim” компанияси бош директори Tashkent Pharma Park кластерига қизиқиш билдирди ва кластерни бориб кўрди. (https://t.me/Uzpharm_agency/8997?single)
Фармацевтика тармоғини ривожлантириш агентлиги директори А.Азизов Туркия Республикасида бўлди. Учрашувларнинг иккинчи кунида "Universal Certification" компаниясининг бош ижрочи директори Усмон Чамчи билан учрашди. "Universal Certification " турк компанияси сертификатлаштириш фаолияти доирасида консалтинг хизматларини тақдим этади. Учрашув давомида мазкур компания Ўзбекистон Республикасида ИСО:13485 халқаро стандартлари бўйича сертификатлаштириш органини яратиш тўғрисида мулоқотлар ўтказилди. Томонлар ишчи гуруҳ тузиш ва ушбу органни амалга ошириш бўйича ҳамкорликда чора-тадбирлар режасини ишлаб чиқишга келишиб олдилар.

Шунингдек, Агентлик директори “ARIS” ва “Bilim Ilaç” ишлаб чиқариш корхоналарида ҳам бўлди. У ерда корхона вакиллари ишлаб чиқаришнинг тўлиқ цикли билан таништириб, унда автоматлаштириш тизимлари ва ишлаб чиқариш механизмлари ҳақида батафсил маълумот бердилар. “ARIS” ва “Bilim Ilaç” компаниялари Ўзбекистон бозори тадқиқотларига қизиқиш билдириб, келгусидаги ҳамкорлик истиқболларини муҳокама қилдилар.