Куни кеча Фармацевтика тармоғини ривожлантириш агентлиги вакиллари ҳукумат делегацияси таркибида Корея Республикасида бўлиб қайтди.

Ташрифнинг илк кунида 1996 йилда асос солинган «NCG Group» компанияси раиси билан учрашув бўлиб ўтди. Қурилмаларни лойиҳалаштириш борасида етакчилардан бўлган мазкур компания фармацевтик инвестицион лойиҳалар билан ҳам шуғулланиб, учрашув чоғи юртимизда шундай лойиҳалардан бирини ишга тушириш борасида музокаралар ўтказилди. Натижада компания вакиллари жорий йил октябрида шифобахш женьшень ўсимлигини қайта ишлаш лойиҳасини йўлга қўйиш мақсадида Ўзбекистонга ташриф буюрадиган бўлди.

Ташрифнинг иккинчи куни бизнеc-форум якунига кўра «Bookook Securities Co.» ҳамда «K&U Investment and Consulting» молиявий-инвестицион компаниялари, тиббий ускуналарни ишлаб чиқарувчи «With Global» корхонаси, биотехнологиялар соҳасида, физик, кимёвий ҳамда тиббий ускуналар борасида изланишлар олиб борувчи «World Science» компанияси раҳбарлари билан музокаралар олиб борилди. Ҳамкорлик шартлари, “Tashkent Pharma Park” инновацион илмий-ишлаб чиқариш фармацевтика кластери ва эркин иқтисодий зоналарда хорижий компанияларга яратилган преференция ва имтиёзлар билан танишиб чиққан хориж томони истиқболдаги ҳамкорлик учун Ўзбекистонда маркетинг тадқиқотларини ўтказишга қарор қилди.

  Шунингдек, Корея Экспорт-импорт банки (KEXIM) ҳамда Иқтисодий ҳамкорлик ва тараққиёт жамғармаси (EDCF) вакиллари билан ҳам учрашув ташкиллаштирилиб, унда “Tashkent Pharma Park” қурилиш лойиҳасини деталлаштириш учун консультантлар тайинлашни тезлаштириш, лойиҳа иккинчи босқичига консультантларни саралаш учун техник вазифани ишлаб чиқиш масалалари муҳокама этилди.