Фармацевтика тармоғини ривожлантириш агентлиги директорининг биринчи ўринбосари Улуғбек Эгамов бошчилигидаги экспертлар гуруҳи Корея Республикасига ташриф буюришди.

Ташриф давомида Корея Республикаси Иқтисодиёт ва молия вазири ўринбосари Ким Сон Ук ва Эксимбанк вице-президенти Пак Чон Гью билан музокаралар олиб борилди.

Музокаралар чоғи “Tashkent Pharma Park” инновацион илмий-ишлаб чиқариш фармацевтика кластерининг таълим ва илмий-тадқиқот компонетларини яратиш” бўйича Корея ҳукумати EDCF жамғармаси томонидан молиялаштирилаётган лойиҳанинг 1 ва 2-босқичлари амалга ошириш суръатларини тезлаштириш масалалари кўриб чиқилди.  Шунингдек, мазкур лойиҳанинг қиймати 125 млн. АҚШ долларига тенг бўлган 2-босқичини амалга ошириш ҳақидаги ҳужжатнинг имзолаш маросими бўлиб ўтди.

Таъкидлаш даркорки, лойиҳанинг 2-босқичи доирасида 250 жойга мўлжалланган тиббий госпиталга эга бўлган Клиник тадқиқотлар марказининг қурилиши ва Илмий-тадқиқот маркази билан бир қаторда зарур ускуналар билан таъминланиши, 1-босқичда бунёд этилиши режалаштирилган Дата-марказининг тўлиқ жиҳозланиши кўзда тутилган.

Келаси йилда кредит шартномасининг имзоланиши ва лойиҳа 2-босқичи доирасида қурилиш объектларини лойиҳалаштириш учун консультантларнинг саралаб олиниши кутилмоқда.  

Фармацевтика тармоғини ривожлантириш
агентлиги Матбуот хизмати