Маълумки, 29 июль куни Олмалиқ шаҳрида Ўзбекистон Республикаси Президенти Шавкат Мирзиёев «Jurabek laboratories» қўшма корхонасига ташриф буюриб, “Спутник V” ҳамда ZF-UZ-VAС2001 вакциналарини ишлаб чиқариш учун яратилган техник имкониятлар билан танишди.

Ушбу лойиҳа туфайли ОАВ ва жамоатчилик томонидан корхона фаолияти ҳамда техник потенциалига бўлган қизиқиш тобора ўсиб бормоқда.

Корхона 1994 йилда “Журабек” хусусий дорихонаси сифатида юзага келди. Фаолиятининг илк куниданоқ корхонада ассортиментни кенгайтириш ва чиқарилаётган маҳсулот сифатини жаҳон стандартлари даражасига етказиш кўзланди.

Бу мақсаддан келиб чиққан ҳолда 1996 йилда аптека негизида “Ace Laboratories Ltd” (Ҳиндистон) ва “Bravo Medical Equipment Trading. Est.” (БАА) компаниялари билан ҳамкорликда “Jurabek Laboratories” қўшма корхонаси очилди.

1999 йилда капсулали препаратларни ишлаб чиқарувчи цех фаолияти йўлга қўйилди. Компания учун биринчи бўлган бу цех Ўзбекистонда капсула шаклидаги дори-дармонлар ишлаб чиқарилишини бошлаб берди.

2001 йилда Польшанинг «Polfa Grodzinsk» компанияси билан ҳамкорликда таблеткали препаратлар ишлаб чиқариш бошланди.

“Jurabek Laboratories” компанияси мутахасиссларининг катта ютуқларидан бири 2004 йилда Ўзбекистон учун янгилик бўлган цефалоспорин қаторидаги антибиотиклар ишлаб чиқариш цехи фаолияти йўлга қўйилгани бўлди. Бугунги кунда цефалоспоринлар ички бозорининг салмоқли қисмини айнан шу компаниянинг антиботиклари ташкил этади, бу эса, ўз навбатида даволаш муассалари мутахассислари ва аҳолининг мазкур корхона препаратларига ишончи юқорилигидан далолат беради.

2006 йилда “Jurabek Laboratories” компаниясида импорт ўрнини босувчи маҳсулотлар ишлаб чиқарилишини маҳаллийлаштириш дастурига киришилди. Ушбу йўналишда амалга оширилган чора-тадбирлар мамлакатимизда талаб юқори бўлган тиббий маҳсулотлар импортини қисқартирган ҳолда, корхонанинг ички бозордаги позициясини мустаҳкамлаш имконини берди.

Компания мутахассислари фаолияти Ўзбекистон Республикаси Соғлиқни сақлаш вазирлиги томонидан юқори баҳоланиб, 2007 йилда “Jurabek Laboratories” “Энг яхши ишлаб чиқариш корхонаси” деган мақомга эга бўлди.

“Jurabek Laboratories” маҳсулотларининг сифати жаҳон стандартларига мослиги DQS немис сертификацион органининг Сифат бошқаруви тизимини жорий қилиш ҳақидаги  SO 9001 ва ISO 13485 сертификатлари, шунингдек ишлаб чиқариш шароитлари Европанинг 2003/94/ЕИ директивасига асосан Зарур ишлаб чиқариш амалиёти (EU-GMP)га мослиги ҳақидаги сертификати билан тасдиғини топган.

Компанияда ишлаб чиқаришни кенгайтириш учун давлат кўмагида инвестицияларни жалб қилиш масаласига катта эътибор қаратилади. Жумладан, 2008 йилда Европа тикланиш ва тараққиёт банки билан гранулалардан тайёрланган полипропилен флаконларда инфузион препаратларпни ишлаб чиқариш бўйича ноёб лойиҳани молиялаштириш борасида шартнома имзоланди. Янги бу маҳсулот Ўзбекистонда сотилаётган муқобилларидан қатор устунликларга эга эди.

Компания тараққий топиб, ишлаб чиқариш майдонларини кенгайтириб борди. Бу нафақат ишлаб чиқарилаётган маҳсулотлар кўламини кенгайтириш, балки ички ва ташқи бозорда мустаҳкам ўрин эгаллаш имконини бермоқда. Бугунги кунда қўшма корхона экспорти географияси 15 дан зиёд давлатларни қамраб олган.

Ҳозирда “Jurabek Laboratories” 48 миллион флакон инфузион эртималар, 480 миллион ампула, 60 миллион қуруқ антибиотиклар, 20 миллион лиофилизацияланган дори воситаларини ишлаб чиқариш қувватига эга.

Қўшма корхона томонидан 300 дан зиёд номдаги маҳсулот, жумладан, пандемия шароитида аҳамияти тобора ошиб бораётган  ремдесивир, фавипиравир, гепарин, эноксапарин препаратлари ишлаб чиқарилмоқда.

Шу билан бирга бу ерда қиймати 30 миллион долларлик янги лойиҳага қўл урилган бўлиб, унинг доирасида инсон танасини ёт антигенлардан ҳимояловчи моноклонал антитаначалар шаклидаги дориларни ишлаб чиқариш мўлжалланган.

Айни вақтда ҚК томонидан икки турдаги вакцина ишлаб чиқарилиши режалаштирилган, бу Россиянинг “Спутник V” ҳамда ўзбек-хитой ZF-UZ-VAC2001 вакциналаридир.

“Jurabek laboratories”  “Спутник V” вакцинасининг илк валидацион партиясини қуйиш ишларини амалга оширди. Вакцина сифат назоратидан ўтиши учун Н.Ф.Гамалея номидаги Эпидемиология ва микробиология миллий тадқиқот марказига (Россия) жўнатилиб, марказдан ижобий натижалар ҳам олинди. Бу эса “Jurabek laboratories”  ҚК томонидан вакцинани қуйиш ишлари йўлга қўйилишига асос бўлиб хизмат қилади.