Жорий йилнинг 7 февраль куни "Олтин воҳа" телеграм каналида "Р/500 ёзуви бўлган парацетамол таблеткасини қабул қилишдан сақланинг” сарлавҳаси остида хабар жойланди. Мазкур хабарга эса (эътибор беринг!) Фарғона вилояти Учкўрик туманида фаолият юритаётган «ZUNNUR SERVIS FARM» МЧЖ томонидан ишлаб чиқарилган "Парацетамол 500 мг" дори воситаси фотоси илова қилинган.

Фармацевтика тармоғини ривожлантириш агентлиги ушбу хабар юзасидан раддия билдириб, қуйидагиларни маълум қилади:

"Олтин воҳа" телеграм каналида айтилган "Фуқаролар Р/500 ёзуви бўлган парацетамол таблеткасини қабул қилишдан сақланишлари, ушбу ҳапдори янги чиққан оппоқ ва ярқироқ тусда бўлиб, шифокорларнинг айтишича, унинг таркибида "Мачупо" деб аталувчи вирус мавжудлиги, у дунёдаги энг хавфли вируслардан бири ҳисобланиши" ҳақидаги маълумотлар хақиқатга тўғри келмайди!

Aйнан шу мазмундаги хабарлар илк марта анголаликлар томонидан 2015 йилда ўйлаб топилган бўлиб, кейинчалик бошқа тилларга таржима қилиниб, уйдирма жуда тез оммалашиб кетади. Маълумот учун, хабарда айтилган "Мачупо" вируси таблеткада узоқ вақт давомида яшай олиши илмий нуқтаи назардан исботланмаган.

Хўш, мачупо қандай вирус?

Wikipedia сайтидан олинган маълумотга кўра, мачупо вируси (lot. Machupo mammarenavirus, MACV) - бу Arenaviridae оиласига мансуб вирус тури ҳисобланади. 1963 йилда Карл Жонсон ва унинг ҳамкасблари томонидан Жанубий Aмерикалик одамларда ва Calomys callosus туридаги кемирувчиларда аниқланган.

Вирус Боливия геморрагик иситмасининг қўзғатувчиси (ингл. Bolivian hemorrhagic fever). Ушбу вирус билан касалланиш биринчи марта Боливияда 1959 йилда қайд этилган. Кейинчалик эпидемия Боливиянинг шимолий қисмида 1971 ва 1994 йилларда кузатилган.

Юқоридаги хабарга илова қилинган фотодаги «ZUNNUR SERVIS FARM» МЧЖ томонидан ишлаб чиқарилган "Парацетамол 500 мг" дори воситаси таркибида "Мачупо" вируси борлиги тўғрисидаги маълумотларга келсак, айтиб ўтиш лозимки, Ўзбекистон Республикасининг 2016 йил 4 январда тасдиқланган "Дори воситалари ва фармацевтика фаолияти тўғрисида”ги Қонунига кўра:

Дори воситалари, тиббий буюмлари ва тиббий техниканинг тиббиёт амалиётида қўлланилишига, қоида тариқасида, улар давлат рўйхатидан ўтказилганидан кейин рухсат этилади (12-модда);

Маълумот учун: «Парацетамол 500мг» дори воситаси белгиланган тартибда давлат рўйхатидан ўтган. (Рўйхатдан ўтган рақами DV/M 0293/12/19)

Фармацевтика фаолиятининг дори воситаларини ҳамда тиббий буюмларни ишлаб чиқариш йўналишлари белгиланган тартибда бериладиган лицензия асосида амалга оширилади (15-16-моддалар);

Маълумот учун: «Парацетамол 500мг» дори воситасини ишлаб чиқарган «ZUNNUR SERVIS FARM» МЧЖ фармацевтик фаолият учун лицензия берилган корхоналар рўйхатида мавжуд. Лицензия рақами – 13869 (09.12.2016)

Шунингдек, Вазирлар Маҳкамасининг 2011 йил 28 апрелдаги 122-сон қарорига мувофиқ, фармацевтика маҳсулотлари мажбурий тарзда сертификатлаштирилиши белгиланган бўлиб, «Парацетамол 500мг» дори воситаси Фармацевтика тармоғини ривожлантириш агентлигининг Дори воситалари, тиббий буюмлар ва тиббий техника экспертизаси ва стандартлаштириш давлат маркази томонидан ўрнатилган тартибда сертификатлаштириш мақсадида синовлардан ўтказилган ва сифатини тасдиқловчи мувофиқлик сертификати расмийлаштирилган.

Юқоридагилардан келиб чиқиб, Фармацевтика тармоғини ривожлантириш агентлиги тегишли қонун хужжатларига асосан, «Парацетамол 500мг» дори воситаси:

— Фармацевтика маҳсулотларини ишлаб чиқариш фаолияти учун берилган лицензияга эга корхона томонидан ишлаб чиқарилганлиги;

— Белгиланган тартибда давлат рўйхатидан ўтказилиб “Тиббиёт амалиётида қўлланилишига рухсат этилган дори воситалари, тиббий буюмлар ва тиббий техника Давлат реестри”га киритилганлиги;

— Аккредитациядан ўтган сертификатлаштириш органлари томонидан тегишли лаборатория синовларидан ўтказилиб, мувофиқлик сертификатига эга бўлган маҳсулот эканлигини ва бу дори воситасининг сифати борасида юртдошларимиз хавотирга тушмасликлари кераклигини билдиради.

Шу ўринда, Фармацевтика тармоғини ривожлантириш агентлиги Матбуот хизмати соҳага оид саволлар бўйича доимо мулоқотга тайёр эканлигини маълум қилиб, "Олтин воҳа" телеграм канали маъмурларига:

— Ижтимоий тармоқлар орқали ишлаб чиқарувчи ёки рақобатчини обрўсизлантириш ёхуд иқтисодий зарба бериш мақсадида асосланмаган, ёлғон овозли, фото ва видеохабарларни тарқатгатлик учун Жиноят кодексининг 192-моддасида жавобгарлик белгиланганлигини;

— жамоат тартибига ёки хавфсизлигига таҳдид солувчи ёлғон ахборотни тарқатиш, шу жумладан, ОАВ, телекоммуникация тармоқлари ёки Интернет жаҳон ахборот тармоғида тарқатганлик учун Маъмурий жавобгарлик тўғрисидаги кодекснинг 202²-моддасида жавобгарлик белгиланганлигини;

— “Ахборотлаштириш тўғрисида”ги Қонуннинг 12¹-моддаси 2-қисмига мувофиқ, веб-сайтнинг ва (ёки) веб-сайт саҳифасининг эгаси, шу жумладан блогер ҳамма эркин фойдаланиши мумкин бўлган ахборот жойлаштириладиган Интернет жаҳон ахборот тармоғидаги ўз веб-сайтига ва (ёки) веб-сайт саҳифасига ҳамма эркин фойдаланиши мумкин бўлган ахборотни жойлаштиришдан аввал унинг тўғрилигини текшириши, шунингдек, жойлаштирилган ахборотнинг нотўғрилиги аниқланган тақдирда уни дарҳол ўчириб ташлаши шартлигини эслатиб ўтади.

Ҳурматли юртдошлар!

Фармацевтика соҳасига оид Сизни қизиқтирган саволлар, таклиф ва мулоҳазалар бўлса, шахсингиз ҳақидаги маълумотларни илова қилган ҳолда телеграмдаги қуйидаги @uzpharmagency_bot манзилимиз орқали мурожаат этишингиз мумкин.

Албатта, ҳар бир мурожаатга эътибор қаратилиши, тегишли мутахассислар томонидан жавоблар берилиши таъминланади.

Биз билан боғланиш: (71) 203-81-81

—