2021 йил 1 январдан тиббий буюмлар ишлаб чиқариш ва улгуржи сотиш билан шуғулланувчи тадбиркорлар учун лицензия олиш тартиби бекор қилинади. У ҳолда дори воситалари ёки тиббий буюмлар сифати қандай кафолатланади?

«Лицензиялашдан ташқари яна қанақанги тартибга солиш усуллари бор экан, деган савол пайдо бўлади. Буни айнан тиббий буюмлар мисолида кўрадиган бўлсак, биламизки, тиббий буюмларнинг асосий қисми давлатнинг бир нечта ташкилотларида назоратдан ўтказилади. 

Дейлик, тадбиркор шундай буюмларни ишлаб чиқарди. Сўнг ССВ ҳузуридаги Фармацевтикани ривожлантириш агентлигидан давлат рўйхатидан ўтказилиши керак. Бу жараён осон эмас. Унга 3 ойдан 6 ойгача вақт кетади. Тўғри ишлаб чиқарганми-йўқми, аниқланиб, рўйхатга олинади. Тиббий буюмдан фойдаланиш мумкинлиги тўғрисида хулоса берилади. Бу тартиб сақланиб қолади. 

Кейин «Ўзстандарт» бор. Ундан ҳам ўтилади. Фармонда техник тартибга солиш ҳам ҳисобга олинган, албатта. Нималарга риоя қилиниши кераклиги ҳаммаси белгиланган. 

Авваллари тадбиркор шунча ташкилот назоратидан ўтиб, кейин лицензия олиш учун мурожаат қилар эди. Бу органлар текширувнинг барча қисмини қамраб олгани учун биз лицензияни бекор қилишга қарор қилдик. Лекин хавфсизлик талаблари доимий назоратда бўлади» – деди Дилшод Шодиев.

Эслатиб ўтамиз, 24 август куни «Лицензиялаш ва рухсат бериш тартиб-таомилларини тубдан такомиллаштириш чора-тадбирлари тўғрисида»ги президент фармони эълон қилинди. Унга кўра, 2021 йил 1 январдан 78 турдаги фаолият билан лицензия ёки рухсатнома олмасдан туриб шуғулланишга рухсат берилади.

Фармацевтика тармоғини ривожлантириш агентлиги Матбуот хизмати