Сифати кафолатланмаган дори воситаларининг ноқонуний айланмасига қарши божхона органлари томонидан тизимли равишда кураш олиб борилмоқда.

Тошкент вилояти божхона бошқармаси “Навоий” чегара божхона постига қўшни мамлакатдан кириб келган фуқаро Т.И. бошқарувидаги “Камаз” русумли автотранспорт воситаси ўрнатилган тартибда божхона кўригидан ўтказилди.

Натижада, автомашина кабинасининг тепасидаги ҳаво фильтри ичида, йўловчи божхона декларациясида кўрсатилмаган ва оғзаки сўровда маълум қилинмаган, умумий қиймати 19,4 миллион сўмлик 92 қути сифати кафолатланмаган дори воситалари борлиги аниқланди.

Яна бир ҳолатда мазкур постга кириб келган, фуқаро А.Ж. бошқарувидаги “Камаз” русумли автотранспорт воситаси ўрнатилган тартибда божхона кўригидан ўтказилди. Натижада, автомашина салонида умумий қиймати 24,8 миллион сўмлик 124 қути дори воситалари яширилганлиги фош бўлди.

Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.

Фармацевтика тармоғини ривожлантириш агентлиги Матбуот хизмати