Иммунитетни кўтарувчи дорилар қанчалик самарали?
Салкам бир йилдан буён дунё коронавирусга қарши курашмоқда. Афсуски, ғалаба ҳали қўлга киритилмади. Тўғри, вакциналар ишлаб чиқарила бошланди, ҳадемай инсоният тафаккури коронавирусни енгиш усулини ҳам топар балки. Бироқ унгача яна қанча қурбонлар берилади, буниси номаълум. Энди ҳар ким ўзи учун ўзи масъул эканини англай бошлади. Касалликдан ўзини ҳимоялашга киришди. Кимдир овқатланиш рационига ўзгартириш киритган, кимдир иммунитет кўтарувчи дорилар истеъмолига эътибор қаратган, яна бошқаси жисмоний фаолликни оширган...
Витаминга бой маҳсулотларни истеъмол қилиш, жисмонан фаол бўлишнинг организмга фойдаси ниҳоятда катта эканини биламиз. Бироқ иммунитетни оширувчи дориларни мунтазам қабул қилиш нечоғли ўринли? Аслида бундай воситалар тождор вирусдан ҳимояланишда самара берадими? Уларнинг кўп истеъмоли саломатликка зиён етказмайдими? Шу каби саволлар билан Ўзбекистон Фанлар академияси Иммунология ва инсон геномикаси институти илмий ходими Шерзод МУХТОРОВга мурожаат қилдик.
Иммунитет нима?
— Иммунитет организмнинг бактерия ва вируслар, замбуруғлардан ҳимояланиши, уларга қаршилик кўрсатишидир. У уч хил кўринишда намоён бўлади:
Филогенетик иммунитет – насдан-наслга ўтадиган номахсус ҳимоя омиллари. Бу омиллар патоген агентлар билан биринчи бўлиб алоқа қилади. Натижада одам организмининг кўпгина юқумли касаллик қўзғатувчиларга чидамлилиги таъминланади.
Туғма иммунитет – бир биологик турнинг маълум бир патоген агентга нисбатан чидамлиги бўлиб, у ҳам наслдан-наслга ўтади. Масалан, ит, қорамол, товуқларнинг ўлат касаллиги қўзғатувчилари одамларга юқмайди, ўз навбатида, одамлардаги захм, қизамиқ, вирусли гепатит, ОИТС қўзғатувчилари ҳайвонларда касаллик қўзғатмайди.
Орттирилган иммунитет – ҳаёт давомида организм иммун тизимининг ёт антигенлар билан таъсирлашуви ҳисобига юзага келадиган ҳимоя бўлиб, наслдан-наслга ўтмайди. Орттирилган иммунитет табиий ва сунъий бўлади. Табиий фаол иммунитет юқумли касалликдан соғайгандан сўнг юзага келади. Сунъий иммунитет вакциналар билан эмлаганда, зардоб, қон, иммуноглобулин ва плазмалар юборилгандан сўнг ҳосил бўлади. Муайян тўқима ва аъзода маълум бир омилга қарши ривожланган ҳимоя эса маҳаллий иммунитет деб аталади. Бу ҳимоя сиртқи иммун тизим аъзоларининг фаоллиги ҳисобига юзага келади.
Дори воситалари иммунитетни мустаҳкамлайдими?
Иммунитетни кўтаришга мўлжалланган дори воситалари, яъни иммуномодуляторлардан билиб- билмай фойдаланиш керак эмас. Боиси бундай дориларга доим ҳам ишонч йўқ. Афсуски, бугун уларнинг рекламаси ниҳоятда кўп. Одамлар ишонувчан, дорилардан истеъмол қилишади. Аслида, иммуномодуляторлар – иммунитет тизимига таъсир қилувчи ёки унинг фаолиятида иштирок этадиган биологик фаол моддалардир. Улар патогенларга бевосита таъсир қилмайди, аммо ҳужайраларнинг иммунитетини ўзгартириши мумкин.
Иммуномодуляторларга «Кагоцел», «Полиоксидоний», «Бронхо-мунал», «Галавит», «Деринат», «Циклоферон», «Эхинацея»ни мисол келтириш мумкин. Бу препаратларнинг ҳеч бири инсон иммунитетини кучайтириб қўймайди. Вирусга қарши иммунитет ҳам шакллантирмайди. Шу боис воситалардан фойдаланаётганда иммунолог шифокорга мурожаат қилинг. Боиси киши иммун тизимининг ҳолатини баҳолаш учун амалга ошириладиган комплекс таҳлил иммунограмма текширувларини ўтказмасдан туриб, иммуномодулятор дори воситаларини қабул қилиш тавсия этилмайди.
Иммунитетни нима кучайтиради?
Иммунитетни мустаҳкамлаш учун табиий таркибида кўплаб витаминлар сақлайдиган воситалардан фойдаланган маъқул. Масалан, ҳўл мевалар, сабзавотли салатлар, суюқликлар, дамламаларни кўпроқ истеъмол қилиш тавсия этилади. Айниқса, анор, олма, лимон, қатиқ, пиёз, саримсоқ пиёз, асал, қовоқ, бурукли карами, қора седанани мунтазам танаввул қилиш кони фойда. Бундан ташқари, кўк чой, череда (иттиканак), мойчечак, занжабил, қуритилган йерба мате барглари, қизил мия илдизи дамламалари иммунитетни кўтаришда қўл келади.
Иммун тизим — организмдаги энг нозик жараёндир. Иммунитет ҳар қандай ҳолатда, дори-дармон қабул қилсак ҳам, қилмасак ҳам касалликлар билан курашаверади. Фақатгина дори-дармонларни тўғри қабул қилишимиз керак. Организмнинг иммун жараёнини бузмаслик лозим. Иммун тизимга ўзбошимчалик билан тартибсиз аралашиб бўлмайди. Чунки иммуномодуляторларни ноўрин қабул қилиш организмда баъзи аутоиммун касалликларни вужудга келтириши мумкин.
«Mahalla» мухбири
Садоқат МАХСУМОВА ёзиб олди.
Фармацевтика тармоғини ривожлантириш агентлиги Матбуот хизмати