Жаҳон соғлиқни сақлаш ташкилотининг экспертлари COVID-19 коронавирус инфекциясидан ҳимояланиш учун болалар 12 ёшдан бошлаб худди катталар каби тиббий ниқоб тақиши зарурлигини маълум қилди. Бу ҳақда Reuters хабар берган.

Мазкур тавсия ЖССТ ҳамда БМТ қошидаги ЮНИСЕФ ташкилотининг қўшма ҳужжатида келтириб ўтилган. Ташкилот мутахассисларининг фикрича, 12 ёш ва ундан катта болалар тиббий ниқоб тақиши, ижтимоий масофаланишга риоя этиши жуда муҳим.

Тадқиқотлар юқори синф ўқувчилари бўлган болалар бошланғич синф ўқувчиларига нисбатан янги турдаги коронавирус инфекциясининг тарқалиб кетишида фаол иштирок этиши мумкинлигини кўрсатган.

Шунингдек, экспертлар 6 ёшдан 11 ёшгача бўлган болаларга тиббий ниқоб тақиш ва ижтимоий масофа сақлаш меъёрларига амал қилиш касаллик тарқалган ҳудуддаги вазиятга қараб тавсия қилинишини таъкидлаган. Ҳудуддаги касалланишлар сони, бу борадаги вазият, тиббий ниқоб билан таъминланганлик даражаси, болаларнинг кекса ёшдаги кишилар билан мулоқот қилишининг эҳтимоли шулар жумласидан.

ЖССТ ҳамда ЮНИСЕФ беш ёшдан кичик болалардан тиббий ниқоб тақишини талаб қилмаслик кераклигини қайд этган.

13 июлда ЖССТ фавқулодда касалликлар техник гуруҳининг бўлинма раҳбари Мария Ван Керкхове 10 ёш ва ундан кичик болаларда COVID-19 коронавирус инфекцияси билан касалланиш ҳолатлари сони жуда камлиги ва уларда касаллик нисбатан енгил кечишини айтган.

30 июлда ЖССТ раҳбари Тедрос Гебрейесус дунёнинг қатор давлатларида коронавирус билан касалланиш ҳолатларининг кескин ошишига зарурий ҳимоя чораларига риоя қилмаётган ёшларнинг бепарволиги сабаб бўлаётгани ҳақида гапирган.

Фармацевтика тармоғини ривожлантириш агентлиги Матбуот хизмати