Қирғизистон ҳукумати томонидан 2018 йил 28 августда қабул қилинган “Дори воситалари айланмаси соҳасида давлат рўйхатига олиш билан боғлиқ баъзи масалалар тўғрисида”ги 405-сонли қарорига кўра:

2021 йилнинг 1 июлга қадар дори воситаларини давлат рўйхатидан ўтказиш ушбу Қарорнинг 1-банди билан тасдиқланган тартибга, ёки Евроосиё иқтисодий комиссияси Кенгашининг 2016 йил 3 ноябрдаги 78-сонли қарори билан тасдиқланган «Тиббий мақсадларда фойдаланиладиган дори воситаларини рўйхатга олиш ва экспертизадан ўтказиш қоидалари»га мувофиқ амалга оширилади.

Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги Қирғизистон Республикасининг ЕОИИга аъзо бўлиши муносабати билан ўз маҳсулотларини ушбу давлатга экспорт қилувчи маҳаллий фармацевтика компанияларига 2021 йил 30 июнга қадар рўйхатга олиш маълумотларини тақдим этиши ва белгиланган тартибда тўловни амалга оширишларини тавсия этади.

Қирғизистон Республикаси ЕОИИга аъзо бўлганидан сўнг, рўйхатдан ўтиш тартиби ЕОИИнинг белгиланган қатъий қоидаларига мувофиқ амалга оширилади.