Куни кеча ижтимоий тармоқларда Aндижон шаҳридаги дорихонадан “Меновазин” маҳсулотини харид қилган фуқаро унинг сифатидан норози эканлиги билдирилган видео тарқалди.

Фармацевтика тармоғини ривожлантириш агентлиги олиб борган ўрганиш натижасига кўра, видеода сифатсизлиги айтилаётган маҳсулот "SARA FARM-25" хусусий корхонаси томонидан ноқонуний йўллар билан ишлаб чиқарилганлиги ва мазкур корхонанинг дори воситаларини ишлаб чиқариш ҳуқуқига эга бўлган лицензиатлар реестрида мавжуд эмаслиги аниқланди.

Фармацевтика тармоғини ривожлантириш агентлиги ижтимоий тармоқларда тарқалаётган видеодаги “Меновазин” маҳсулоти ноқонуний ишлаб чиқарилганлигини Республика худудида фаолият юритаётган дорихоналар эътиборига етказиб, Ўзбекистон Республикасида рўйхатдан ўтказилмаган, сифатсиз, қалбакилаштирилган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини сақлаш ва (ёки) реализация қилишга йўл қўймасликликлари, ушбу ҳолатлар лицензиянинг амал қилиши белгиланган тартибда тўхтатилишига олиб келадиган, лицензия талаблари ва шартларини қўпол равишда бузилиши ҳолатлари эканлиги ҳақида огоҳлантиради.

Шу ўринда, “SARA FARM-25” корхонасининг ноқонуний фаолияти юзасидан Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментига мурожаатнома юборилганлиги ҳамда белгиланган талабларга номувофиқ ишлаб чиқарилган “Меновазин” маҳсулотини сотган дорихона ваколатли орган томонидан назоратга олинганлигини маълум қиламиз.