Ҳар йили 8 сентябрь куни нишонланадиган Халқаро журналистлар бирдамлиги куни (International Day of Journalists’ Solidarity) 1958 йилда Бухарест шаҳрида Халқаро журналистлар ташкилотининг 4-конгрессида таъсис этилган. Конгресс депутатлари ғоясига кўра, шу куни барча мамлакатлар ва нашрларнинг журналистлари дунёга ўзларининг бирдамлигини намойиш этишлари керак, айниқса, ўз ҳуқуқларини ҳимоя қилишда.

Айтиш жоиз, ушбу санани танлашда фожеали воқеалар сабаб бўлган. 1943 йил 8 сентябрда Германияда чехословакиялик журналист ва фашизмга қарши курашувчи ёзувчи Юлиус Фучик қатл этилган. У ёшлигиданоқ сиёсатга қизиқиб, 1921 йилда Чехословакия Коммунистик партиясининг асосчиларидан бирига айланади. 1941 йилда Фучик Коммунистик партиянинг иккинчи марказий яширин ҳукуматининг аъзосига айланади. 1942 йил 24 апрелда у гестапо томонидан озодлик ҳаракатининг олти аъзоси билан бирга ҳибсга олинади.

Юлиус Фучик Прага қамоқхонасида ёзган “Бўйинда сиртмоқ билан яратилган репортаж” китоби билан бутун дунёга танилган. Унинг вафотидан кейин китоб дунёнинг 70 тилига таржима қилинган ва 1958 йилдан буён Юлиус Фучикнинг вафот этган куни Халқаро журналистлар бирдамлиги куни сифатида нишонлаб келинади.

ХХ-асрнинг охирида БМТнинг навбатдаги анжуманида 8 сентябрь - Халқаро журналистлар бирдамлиги куни деб эълон қилинди. Бу кун нафақат навбатдаги касб байрами, балки барча журналистлар ўзларининг бирдамлигини ҳис қиладиган кундир.

Халқаро журналистлар бирдамлиги кунида бутун дунёда барча журналистларни бирлаштирадиган анжуманлар ва конгресслар бўлиб ўтади. Ушбу тадбирларда журналистлар ўзларининг тажрибалари билан ўртоқлашадилар ва мукофот оладилар.

Эслатиб ўтамиз, 2013 йилда БМТ Бош ассамблеяси ҳар йили 2 ноябрда нишонланадиган Журналистларга қарши жиноятлар учун жазосизликни тўхтатиш халқаро кунини ҳам таъсис этган.

Фармацевтика тармоғини ривожлантириш агентлиги Матбуот хизмати