Жорий йилнинг 8 октябрь куни Россия Федерациясининг Москва шаҳрида Евроосиё иқтисодий иттифоқи (ЕОИИ) Фармакопея қўмитасининг 43-сон йиғилиши офлайн ва онлайн тарзда ўтказилди.

Видеоконференция кўринишида ташкил этилган анжуманда Евроосиё иқтисодий иттифоқи Фармакопея қўмитасига аъзо давлатлар – Арманистон, Беларусь Республикаси, Россия Федерацияси, Қирғизистон Республикаси ва Қозоғистон Республикаси вакиллари билан бир қаторда ЕОИИга кузатувчи сифатида киритилган давлатлар Молдова ва Ўзбекистон Республикасининг мутахассислари ҳам иштирок этишди.

Йиғилишда кун тартибига киритилган қуйидаги долзарб масалалар муҳокамаси ўтказилди:

1. ЕОИИ Фармакопеяси 1-жилди, 3- ва 4-қисмларини тузилиши ҳақида (бунда ЕОИИ Фармакопеясининг Радиофармацевтик дори препаратлари (РФДП), Биологик дори воситалари (БДВ), Доривор ўсимлик воситалари (ДЎВ) ихтисослашган эксперт гуруҳи раҳбарлари сўзга чиқишди);
2. Қўлланма лойиҳасининг 1-қисми. Келиб чиқиши кимёвий ҳисобланган фармацевтикада фойдаланиш учун субстанция (ўзгаришларни ҳисобга олган ҳолда) (ҳужжат лойиҳасини Қозоғистон Республикаси томонидан ишлаб чиқилган), 4-қисми. Биологик дори воситаларини (ҳужжат лойиҳасини Россия Федерацияси томонидан ишлаб чиқилган) кўриб чиқилди;
3. ОФС 2.3.1.2. "Дори воситалари, фармацевтик субстанциялар ва ёрдамчи моддаларни ишлаб чиқариш учун микробиологик тозаликка қўйиладиган талаблар" умумий фармакопея мақоласи юзасидан ЕОИИ Фармакопеясига келиб тушган саволлар кўриб чиқилди.
4. АҚШ Фармакопея Конвенцияси ва Евросиё иқтисодий комиссияси ўртасида англашув меморандуми лойиҳаси тўғрисида муҳокама бўлди.

Йиғилишни ЕОИИ Фармакопея қўмитасининг раиси, профессор Тулегенова Ардак кириш сўзи билан очар экан, бугунги йиғилишнинг ўзига ҳослигини ва кузатувчи сифатида Ўзбекистон Республикасидан мутахассисларни қатнашаётганини алоҳида урғу билан таъкидлади ҳамда 2021 йилнинг 28-июнь куни ЕОИИ Фармакопея қўмитасининг 42-сон йиғилишида Ўзбекистон Республикасига кузатувчи мақоми берилганини эслатиб ўтди.

Шунингдек, тадбирда Ўзбекистон Республикаси Давлат фармакопеяси бош муҳаррири Ҳабибулла Джалилов ҳам сўзга чиқиб, мажлис қатнашчиларига  Ўзбекистон томонидан иштирок этаётган мутахассисларни таништириб, Ўзбекистон Республикаси вакилларини ЕОИИ Фармакопея қўмитаси таркибига кузатувчи сифатида киритилгани учун йиғилиш қатнашчиларига ўз самимий миннатдорчилигини билдирди. Шу билан бирга у мамнуният билан Ўзбекистон Республикаси Давлат фармакопеяси 1-жилди, 1-нашри, 1- ва 2-қисмларда (ўзбек ва рус тилларида) чоп этилганлиги тўғрисида, унинг қонуний асослари, жамланмани ишлаб чиқиш бўйича амалга оширилган ишлар ҳақида тадбир иштирокчиларига маълумот берди.

Бош муҳаррир Ҳабибулла Джалилов Ўзбекистон Республикаси Давлат фармакопеясини ишлаб чиқиш ва нашр этиш ишлари Европа фармакопеяси комиссияси билан Ўзбекистон томони ўртасида тузилган келишувга асосан асосий манба сифатида Европа фармакопеясининг 8-10-нашрлари билан, шунингдек бугунги кунда дунё фармацевтика амалиётида кенг қўлланиб келинаётган Халқаро фармакопея, АҚШ, буюк Британия, Германия, Япония, Россия ва бошқа 10 дан ортиқ давлатларнинг миллий фармакопеяларини таҳлил этиш асосида сўнги, замонавий сифат стандартлари талаблари билан уйғунлашган ҳолда ишлаб чиқилганлигига эътибор қаратди.

Фармацевтика тармоғини ривожлантириш 
агентлиги Матбуот хизмати