Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментига даъвогар томонидан “Temur-Baraka-Pharm” МЧЖга тегишли дорихона томонидан ноқонуний дори воситалари савдоси амалга ошираётганлиги, яъни мувофиқлик сертификати мавжуд бўлмаган “Мабтера” конц д/инф 500/50 мл фл №1 ва “Селлеспт” таб 500 мг №50 дори воситаси сотиб келаётганлиги юзасидан мурожаат келиб тушган.

Шу асосга кўра, Тошкент шаҳар фармацевтика тармоғини ривожлантириш бўлинмаси томонидан белгиланган тартибга мувофиқ, мазкур дорихонада дори воситаларини сақлаш ва реализация қилиш ҳолати юзасидан текширув ўтказилган.

Текширув давомида мурожаатда кўрсатилган “Мабтера” конц д/инф 500/50 мл фл №1 дори воситаси тегишли ҳужжатларсиз дорихонада сақланаётганлиги аниқланган.

Шунингдек, текширув давомида дорихона савдо залидан сифати кафолатланганлигига шубҳа уйғотган дори воситалари “Temur-Baraka-Pharm” МЧЖ раҳбари билан биргаликда сифат назорати учун ўртача намунаси танлаб олинган.

“Дори воситалари, тиббий буюмлар ва тиббий техника экспертизаси ва стандартлаштириш Давлат маркази” ДУКнинг тегишли хулосасига асосан танлаб олинган 8 турдаги 11 хил сериядаги дори воситаларига мувофиқлик сертификатлари расмийлаштирилмаганлиги маълум бўлган.

Мазкур ҳолат бўйича Тошкент шаҳар фармацевтика тармоғини ривожлантириш бўлинмасининг “Temur-Baraka-Pharm” МЧЖга дори воситаларини ва тиббий буюмларни чакана реализация қилиш учун 2021 йил 18 ноябрда берилган ТN № 1101-сонли лицензияни бекор қилиш ҳақида Тошкент туманлараро иқтисодий судига киритган даъво аризаси суднинг тегишли ҳал қилув қарори билан қаноатлантирилди ва “Temur-Baraka-Pharm” МЧЖга дори воситаларини ва тиббий буюмларни чакана реализация қилиш учун берилган лицензия бекор қилинди.

Маълумот учун, “Махсус электрон тизим орқали айрим фаолият турларини лицензиялаш тартиби тўғрисидаги ягона низом”га мувофиқ, дори воситалари ва тиббий буюмларни мувофиқлик сертификатларисиз сақлаш ва (ёки) реализация қилиш, Ўзбекистон Республикасида рўйхатдан ўтказилмаган, сифатсиз, қалбакилаштирилган дори воситаларини ва тиббий буюмларни, шунингдек, Ўзбекистон Республикасида рўйхатдан ўтказилган дори воситаларининг ғайриқонуний нусхаларини сақлаш ва (ёки) реализация қилиш, дори воситалари ва тиббий буюмларнинг фармацевтик маълумотга эга бўлмаган шахс томонидан реализация қилиниши, фаолиятни лицензияда кўрсатилмаган манзилда амалга оширилиши лицензиянинг амал қилишини тугатишга олиб келадиган лицензия талаблари ва шартларини қўпол равишда бузилиши ҳисобланади.

Фармацевтика тармоғини ривожлантириш
агентлиги Матбуот хизмати