Турон Фанлари Академияси Президиумининг қарори асосида Фармацевтика тармоғини ривожлантириш агентлиги ҳузуридаги Тошкент вакцина ва зардоблар илмий тадқиқот институти директорининг илмий ишлар бўйича ўринбосари Иброҳим Маматқуловга ҳамда АҚШнинг IGN-International компанияси раҳбари, РФ олими, Тошкент вакцина ва зардоблар илмий тадқиқот институти консультанти, иммунолог биология фанлари доктори профессор Пётр Игнатовга Турон Фанлари Академияси АКАДЕМИГИ Илмий унвони берилди.

Шу билан бирга институт маъмурияти Пётр Игнатов раҳбарлигида Тошкент вакцина ва зардоблар илмий-тадқиқот институти олимлари ҳамкорлигида СOVID-19 инфекцияси билан касалланган беморларда дастлабки босқичда ингаляция йўли билан қўлланилиши мумкин бўлган "Ковиглобин" воситаси яратилганлиги ва клиникагача бўлган синовлари якунланган ишланмаларини Агентликка тақдим этди.

Эслатиб ўтамиз, жорий йилнинг 23 апрель куни профессор Пётр Игнатов Фармацевтика тармоғини ривожлантириш агентлиги директори Сардор Кариев ва агентлик мутахассислари билан учрашиб музокаралар ўтказган эди.

Пётр Игнатов ташрифи даврида тасдиқланган режа асосида Тошкент вакцина ва зардоблар илмий тадқиқот институти олимлари билан бирга яна иккита препарат - "Ифаст" инъекцион иммуномодулятори ҳамда вакциналар иммуногенлигини оширишда ишлатиладиган "Адъювант-ТошВЗИТИ" воситаси хам яратилганлигини маълум қилди. Хозирда клиникагача бўлган синовлар олиб борилмоқда.

Ҳар икки олимга юксак унвонни ва бу ҳақдаги ҳужжатни Турон Фанлар Академияси президенти Ҳайдарбек Бобобеков топширди. Фармацевтика тармоғини ривожлантириш агентлиги олимларини ушбу мукофот билан табриклайди!