Қашқадарёдан фармацевтика соҳасида кенг қўлланилувчи 12 тонна “Гулхайри” экспорт қилинди
– Ўсимлик гули кунига икки маротаба – эрталаб ва кечки салқинда териб олиниб, сўнг соя жойда бир неча кун давомида қуритилади, – дейди Азамат Чориев. – Томорқа эгалари ўсимлик қуриб, тайёр ҳолга келгач, бизни чақиради. Хом ашё сифатига қараб, унинг ҳар килосини 60-70 минг сўмдан сотиб олаяпмиз. Бир сотих жойдан ўртача 100 кило доривор хом ашё олиш мумкин. Бу 7 миллион сўм пул дегани. Тўрт, беш сотих жойга гулхайри экиб, йигирма беш, ўттиз миллионлаб даромад олаётган оилалар бор. Табиий шароитда, иссиқ қуёш тафтида етиштирилган доривор гиёҳнинг сифати хорижлик ҳамкорларимизга маъқул келмоқда.
Бироқ шуни ҳам эътироф этиш лозимки, сўнгги йилларда кичик корхоналар, фермер хўжаликлари ва томорқа эгалари ҳам турли хилдаги озиқ-овқат, халқ хўжалиги ва экспортбоп маҳсулотларни етиштириб, аҳоли эҳтиёжини қондириш билан бирга, экспорт ҳажмини оширишда ҳам ўзларининг муносиб ҳиссаларини қўшишмоқда.
Aна шундай корхоналардан бири, “BBU Azamat” хусусий корхонаси томонидан воҳада етиштирилган 12 тонна қуритилган гулхайри ўсимлиги Польшага жўнатилди.
Маълумот учун, Гулхайри қадим замонлардан бери шифобахш ўсимлик сифатида ишлатилиб келинади. Aбу Aли Ибн Сино гулхайри илдизидан, баргидан ва уруғларидан тайёрланган дамлама билан йўтал, қон тупуриш, зотилжам ва буйрак касалликларини даволаган. Буюк табиб гулхайри илдизи асосида тайёрланган дори-дармонларни кўкракни юмшатувчи, балғам кўчирувчи омил сифатида тавсия этган.
Гулхайри гуллари боларилар учун яхши озиқ ҳисобланади. Доривор гулхайрининг илдизини одатда кузда ёки эрта баҳорда кавлаб олиниб, дағал илдизпоя ва майда илдизчалардан ажратилади-да, зудлик билан сув оқимида ювиб олинади (илдиз шиллиқланмаслиги учун). Шундан сўнг очиқ ҳавода қуритилади .
Уй шароитида гулхайри илдизидан қуйидагича дамлама тайёрлаш мумкин: бирорта идишга 2 стакан миқдорда қайнатиб совутилган сув қуйилади ва унинг устига 4 чой қошиқ майдаланган илдиздан солиб, 8 соат давомида қўйиб қўйилади. Сўнгра сузиб олиб, шарбатига кунига 3-4 маҳал ярим стакан миқдорда ичилади.
Фармацевтика тармоғини ривожлантириш агентлиги Матбуот хизмати
