Фармацевтика тармоғини ривожлантириш агентлиги ҳузуридаги «Дори воситалари, тиббий буюмлар ва тиббий техника экспертизаси ва стандартлаштириш Давлат маркази» ДУК сифатсиз, контрафакт, яроқлилик муддати тугаган фармацевтик маҳсулотлар юзасидан 2022 йил июнь ойига қадар аниқланган ҳолатлар бўйича маълумот берди.

Ўзбекистон Республикаси ҳуқуқни ҳимоя қилиш идоралари ҳамда жисмоний ва юридик шахслар томонидан Давлат марказининг Ҳуқуқни муҳофаза қилиш органлари мурожаатлари билан ишлаш бўлимига жорий йилнинг 1 июнь санасига қадар 518 та мурожаатлар келиб тушган. Ушбу мурожаатларни ўрганиш давомида тиббиёт амалиётида қўллаш мумкин бўлмаган 3511 турдаги 1 173 607 ўрам дори воситалари аниқланган.

Улардан:
➖ 1357 турдаги 403 375 ўрам давлат рўйхатидан ўтганлиги;
➖ 746 турдаги 470883 ўрам давлат рўйхатидан ўтмаганлиги;
➖ 340 турдаги 4340 ўрам мувофиқлик сертификати мавжуд;
➖ 739 турдаги 286020 ўрам мувофиқлик сертификатлари мавжуд эмас;
➖ 186 турдаги 5167 ўрам ёрлиқлаш кўрсаткичи бўйича контрафакт;
➖ 121 турдаги 855 яроқлилик муддати тугаган (сифатсиз);
➖ 22 турдаги 2967 ўрам қалбакилаштирилган дори воситаларидир. 

Шунингдек, L-Lizina essinat 5 мл №5, Актовегин 40 мг 5мл №5, Церебролизин 5 мл №5, Солкосерил 5 мл №5, Лайботен 1.0 г,  Милдронат 5 мл №10, Ревартон, Тебантин, Сайтатек,  Зардекс, Ковифор, Фатзорб, Вобэнзим номли фармацевтика маҳсулотлари билан боғлиқ қалбакилаштириш ҳолатлари бир неча маротаба такрорланган.

Фармацевтика тармоғини ривожлантириш агентлиги ҳузуридаги Давлат маркази томонидан юқоридаги аниқланган ҳолатлар бўйича лаборатория таҳлиллари ҳақидаги тегишли маълумотлар мурожаатчиларга тақдим қилинди.

Эслатиб ўтамиз, Ўзбекистон Республикасининг «Дори воситалари ва фармацевтика фаолияти тўғрисида»ги қонуни 20-моддасидага мувофиқ cифатсиз, қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини харид қилиш, чакана реализация қилиш ва улардан фойдаланиш тақиқланади.

Фармацевтика тармоғини ривожлантириш
агентлиги Матбуот хизмати