Хитойнинг Sinopharm компанияси коронавирус инфекциясига қарши потенциал вакцинанинг нархини эълон қилди. Компания раҳбариятининг маълум қилишича, икки марталик эмлаш нархи 1000 юандан (144,27 АҚШ доллари) ошмайди, South China Morning Post мақоласига таянган ҳолда хабар беради pharmvestnik.ru.

Компания маълумотларига кўра, вакцина 2020 йил охирида кенг фойдаланишга тайёр бўлади. Ҳозирда компания регулятор органлар тасдиғини олиш учун зарур бўлган вакцина самарадорлиги тўғрисидаги маълумотларни олиш учун Бирлашган Aраб Aмирликларида клиник синовларнинг якуний босқичини бошлади.

Вакцина қиймати Хитойнинг Миллий тиббий суғурта дастури томонидан қопланиши ёки бепул эмлаш тизимига киритилиши ҳақида ҳозирча маълумот йўқ. Sinopharm компанияси ўзининг Ухан ва Пекин шаҳарларидаги заводларида йилига 200 миллион дозадан ортиқ вакцинани ишлаб чиқаришга тайёр.

Aввалроқ АҚШнинг Moderna компанияси кичкина буюртмалар учун номзод вакцинасининг нархи ҳар бир дозаси учун 32-37 долларни ташкил этишини эълон қилганди. Июль ойида AҚШ ҳукумати Pfizer/BioNTech компанияси билан 50 миллион америкаликни эмлаш учун ҳар бир дозаси 40 долларга яқин қийматда вакцинани етказиб бериш тўғрисида шартнома имзолаган.

Фармацевтика тармоғини ривожлантириш агентлиги Матбуот хизмати