Учинчи босқич клиник синовлари Ўзбекистонда ўтказилиши режалаштирилган Хитой вакцинаси билан биринчи навбатда ушбу касалликка чалинмаган инсонлар эмланади. Бу ҳақда Коронавирусга қарши кураш штаби аъзоси Барно Одилова маълум қилди.
Эслатиб ўтамиз, Инновацион ривожланиш вазирлиги Хитой Фанлар Академияси билан Anhui ZhifeiLongcom Biopharmaceutical томонидан ишлаб чиқарилган вакцинанинг учинчи босқич клиник синовларини Ўзбекистонда ўтказилиши маълум қилинган эди.
Унга кўра, синов 18 ва ундан катта ёшдаги кўнгиллиларда ўтказилади ва синов бошланишидан олдин ХХР вакиллари эмлаш шартларини тушунтириш учун бир нечта тренинглар ташкиллаштирилади.
Коронавирусга қарши кураш штаби аъзоси Барно Одилованинг маълум қилишича, кимлар биринчи галда вакцина қилиниши тартибини Республика махсус комиссияси тасдиқлаб берган.
“Ҳар бир мамлакатда биринчи навбатда кимларни вакцина қилиш тартиби тасдиқланган. Коронавирусга қарши вакцина билан барча аҳолини эмлаш зарур. Биринчи навбатда бу касалликка чалинмаган инсонлар эмланади. Чунки касалланган инсонларда иммунитет мавжуд. Иммунитети бор инсонни эмлашга ҳожат бўлмайди”, – деди Барно Одилова.
Хитойдан олиб келинадиган вакцина аввал кўнгиллиларда синаб кўрилади.
“Агар кўнгиллилар орасида бирор кишида асоратлар ёки ножўя таъсир кузатилса, ўша кўнгилли шахс бепул даволанади. Шунингдек, кўнгиллилар иштироки учун пул маблағи берилиши ҳам мумкин”, – дея қўшимча қилди у.
Аввалроқ Инновацион ривожланиш вазири, академик Иброхим Абдураҳмонов “Ўзбекистон 24” телеканалига берган интервьюсида Хитой вакцинасининг хавфсизлик даражаси шунга ўхшаш бошқа вакциналарга қараганда анча юқори эканлигини таъкидлаб ўтган эди.
Вазир, шунингдек, ижтимоий тармоқларда тарқалган ўзбеклар вакциналарни текширишда “тажриба қуёнчалари бўлмаслиги керак, деган фикрларга нисбатан:
“Бу вакцина бўлса ёки бошқа вакцина бўлса ҳам, аҳолимизга қўллашдан олдин биз буни текширишимиз керак”, — дея ўз муносабатини билдирган. Иброҳим Абдураҳмонов мутахассис сифатида ушбу вакцинани синчковлик билан ўрганиб чиққанлигини ва ҳатто уни оила аъзоларига ҳам тавсия қилганини қўшимча қилган.
Сентябрь ойида соғлиқни сақлаш вазирининг ўринбосари, Санитария-эпидемиология ва аҳоли саломатлиги хизмати бошлиғи Баҳодир Юсупалиев Хитой вакцинаси синовидан сўнг Ўзбекистонда ушбу вакцинани ишлаб чиқариш ва қўшни мамлакатларга ҳам экспорт қилиш ҳақида айтиб ўтган эди.
Унинг сўзларига кўра, Ўзбекистон Россия компанияларига ҳам қўшма синовлар ўтказишни таклиф қилган.
“Бугунги кунда биз уларнинг жавобларини кутяпмиз. Ўйлайманки, улар билан ҳам бир вақтда ишлаймиз”, — дея таъкидлаган вазир ўринбосари.
Маълумот учун Ўзбекистон Россиянинг тўғридан-тўғри инвестициялар жамғармасига беш минг доза “Sputnik V” вакцинасини ажратишни сўраб мурожаат қилгани ҳақида хабар берилганди. Бунда жамғарма Laxisam компанияси билан Ўзбекистонга мазкур вакцинадан 35 миллион доза етказиб бериш бўйича келишувга эришилганини маълум қилган.
Аввалроқ Ўзбекистон COVID-19 вакцинаси клиник синовларининг барча босқичи якунланмагунича уни сотиб олмаслиги маълум қилинганди. Август ойи бошларида Шавкат Мирзиёев коронавирусга қарши вакцинани харид қилиш масаласини ўрганишга бир ҳафта муддат берганди. Президент топшириғига биноан вакцинани харид қилиш ва мамлакат аҳолисини эмлашни амалга ошириш йўлларини ўрганиб чиқиш мақсадида етакчи олимлар ва тажрибали шифокорлардан иборат ишчи гуруҳ тузилган.
Фармацевтика тармоғини ривожлантириш агентлиги Матбуот хизмати
