Хабарингиз бор, Вазирлар Маҳкамасининг 2021 йил 3 августдаги “Фармацевтика саноатида Зарур амалиётлар (GxP) талабларини амалга ошириш бўйича қўшимча чора-тадбирлар тўғрисида”ги 486-сон қарорига мувофиқ, Фармацевтика тармоғини ривожлантириш агентлигининг ҳузурида "Зарур амалиётлар маркази" ташкил этилди.

Мазкур марказ томонидан фармацевтика тармоғида фаолият юритаётган корхона ва ташкилотларда Зарур амалиётлар (GxP) талаблари юзасидан фармацевтик инспекциялар ўтказилиб, унинг мувофиқлик натижаларига кўра, зарур амалиётлар сертификати (GxP) тақдим қилиб келинмоқда.

Жумладан, ўтган 2022 йил давомида “Зарур ишлаб чиқариш амалиёти - GMP” талабарини ўз фаолиятида жорий этган ишлаб чиқарувчилар сони 34 тага (129 та ишлаб чиқариш линиялари) етказилди;

“Зарур дистрибюторлик амалиёти – GDP” талабарини ўз фаолиятида жорий этган дистрибьюторлар умумий сони 31 тани ташкил этди;

Ўзбекистон Республикасида илк бора “Зарур лаборатория амалиёти – GLP” талаблари бўйича 1 та корхонага мувофиқлик сертификати расмийлаштирилди;

Тақдим этилган (GxP) сертификатларининг амал қилиш муддатини тасдиқлаш мақсадида дори воситалари ишлаб чиқарувчи ва улгуржи савдоси билан шуғулланувчи корхоналарда 20 та инспекция назорати ўтказилди;

Шу билан бирга, корхоналарда Зарур GxP амалиёти талабларини жорий қилинганлик даражасини ўрганиш, мавжуд муаммоларни аниқлаш ва уларни бартараф этиш учун амалга ошириладиган чора-тадбирлар ҳажмини аниқлаш мақсадида 7 та корхонада баҳолаш инпекциялари ўтказилди.

Бундан ташқари, хорижий ишлаб чиқарувчи корхоналарнинг дори воситаларини давлат рўйхатидан ўтказиш жараёнида “Дори воситалари, тиббий буюмлар ва тиббий техника экспертиза ва стандартлаштириш давлат маркази” ДУКнинг Экспертлар Кенгаши қарорлари асосида жойига чиққан ҳолда, фармацевтик инспекциялар ўтказилиши кўзда тутилган чет эл корхоналарининг 10 тасида “Зарур амалиётлар маркази” томонидан “Зарур ишлаб чиқариш амалиёти – GMP” талабларига мувофиқлик юзасидан фармацевтик инспекциялар ўтказилиб, аниқланган барча камчиликлар тўлиқ бартараф этилганидан сўнг уларнинг 7 тасига мувофиқлик сертификатлари тақдим қилинди ва 3 тасига камчиликларни бартараф этиш учун ўрнатилган ҳолда муддатлар белгилаб берилди.

Эслатиб ўтамиз, Ўзбекистон Республикаси Президентининг 2022 йил 26 октябрдаги ПҚ-411-сон қарорига мувофиқ, 2023 йил 1 январдан бошлаб, Ўзбекистон Республикасида давлат рўйхатидан ўтказишда клиник тадқиқотлар ва ишлаб чиқариш шароитлари «Зарур ишлаб чиқариш амалиёти — GMP» талабларига мувофиқлиги бўйича ўрганишлар ўтказиш талаб этилмайдиган дори воситалари рўйхатида белгиланган дори воситаларидан ташқари барча янги дори воситалари жойига чиққан ҳолда ишлаб чиқариш шароитларининг «Зарур ишлаб чиқариш амалиёти — GMP» талабларига мувофиқлиги ўрганилганидан сўнг Ўзбекистон Республикасида давлат рўйхатидан ўтказилади.