Xabaringiz bor, Vazirlar Mahkamasining 2021 yil 3 avgustdagi “Farmatsevtika sanoatida Zarur amaliyotlar (GxP) talablarini amalga oshirish bo‘yicha qo‘shimcha chora-tadbirlar to‘g‘risida”gi 486-son qaroriga muvofiq, Farmatsevtika tarmog‘ini rivojlantirish agentligining huzurida "Zarur amaliyotlar markazi" tashkil etildi.

Mazkur markaz tomonidan farmatsevtika tarmog‘ida faoliyat yuritayotgan korxona va tashkilotlarda Zarur amaliyotlar (GxP) talablari yuzasidan farmatsevtik inspeksiyalar o‘tkazilib, uning muvofiqlik natijalariga ko‘ra, zarur amaliyotlar sertifikati (GxP) taqdim qilib kelinmoqda.

Jumladan, o‘tgan 2022 yil davomida “Zarur ishlab chiqarish amaliyoti - GMP” talabarini o‘z faoliyatida joriy etgan ishlab chiqaruvchilar soni 34 taga (129 ta ishlab chiqarish liniyalari) yetkazildi;

“Zarur distribyutorlik amaliyoti – GDP” talabarini o‘z faoliyatida joriy etgan distribyutorlar umumiy soni 31 tani tashkil etdi;

O‘zbekiston Respublikasida ilk bora “Zarur laboratoriya amaliyoti – GLP” talablari bo‘yicha 1 ta korxonaga muvofiqlik sertifikati rasmiylashtirildi;

Taqdim etilgan (GxP) sertifikatlarining amal qilish muddatini tasdiqlash maqsadida dori vositalari ishlab chiqaruvchi va ulgurji savdosi bilan shug‘ullanuvchi korxonalarda 20 ta inspeksiya nazorati o‘tkazildi;

Shu bilan birga, korxonalarda Zarur GxP amaliyoti talablarini joriy qilinganlik darajasini o‘rganish, mavjud muammolarni aniqlash va ularni bartaraf etish uchun amalga oshiriladigan chora-tadbirlar hajmini aniqlash maqsadida 7 ta korxonada baholash inpeksiyalari o‘tkazildi.

Bundan tashqari, xorijiy ishlab chiqaruvchi korxonalarning dori vositalarini davlat ro‘yxatidan o‘tkazish jarayonida “Dori vositalari, tibbiy buyumlar va tibbiy texnika ekspertiza va standartlashtirish davlat markazi” DUKning Ekspertlar Kengashi qarorlari asosida joyiga chiqqan holda, farmatsevtik inspeksiyalar o‘tkazilishi ko‘zda tutilgan chet el korxonalarining 10 tasida “Zarur amaliyotlar markazi” tomonidan “Zarur ishlab chiqarish amaliyoti – GMP” talablariga muvofiqlik yuzasidan farmatsevtik inspeksiyalar o‘tkazilib, aniqlangan barcha kamchiliklar to‘liq bartaraf etilganidan so‘ng ularning 7 tasiga muvofiqlik sertifikatlari taqdim qilindi va 3 tasiga kamchiliklarni bartaraf etish uchun o‘rnatilgan holda muddatlar belgilab berildi.

Eslatib o‘tamiz, O‘zbekiston Respublikasi Prezidentining 2022 yil 26 oktyabrdagi PQ-411-son qaroriga muvofiq, 2023 yil 1 yanvardan boshlab, O‘zbekiston Respublikasida davlat ro‘yxatidan o‘tkazishda klinik tadqiqotlar va ishlab chiqarish sharoitlari «Zarur ishlab chiqarish amaliyoti — GMP» talablariga muvofiqligi bo‘yicha o‘rganishlar o‘tkazish talab etilmaydigan dori vositalari ro‘yxatida belgilangan dori vositalaridan tashqari barcha yangi dori vositalari joyiga chiqqan holda ishlab chiqarish sharoitlarining «Zarur ishlab chiqarish amaliyoti — GMP» talablariga muvofiqligi o‘rganilganidan so‘ng O‘zbekiston Respublikasida davlat ro‘yxatidan o‘tkaziladi.

Farmatsevtika tarmog‘ini rivojlantirish
agentligi Matbuot xizmati