Жорий йилнинг 10 февраль куни Фармацевтика тармоғини ривожлантириш агентлигида Ўзбекистон Республикаси Инвестициялар, саноат ва савдо вазирлигининг БААдаги ваколатхонаси бошчилиги остида видеоконференция ўтказилди.

Швейцария компаниясининг БААдаги филиали билан ҳамкорлик алоқаларини йўлга қўйиш мақсадида ўтказилган мазкур учрашувда Агентлик томонидан директор ўринбосари Жамшид Эшмуродов бошчилигидаги экспертлар, вазирлик ваколатхонаси номидан директор Сарвар Ҳамидов бошчилигидаги мутахассислар ва  “Acino MEA FZ LLC” компанияси томонидан Ўрта Осиё мамлакатлари бўйича директор Bird Adrew қатнашди.

Маълумот ўрнида айтиш жоизки, Швейцариянинг қаттиқ орал дори шаклларини етказиб берувчи “Cimex Pharma AG” ҳамда трансдермал пластирлар ва биологик парчаланадиган имплантантларни ишлаб чиқариш бўйича Европада иккинчи ўринда турувчи “Novosis AG” компанияларини сотиб олган “Acino MEA FZ LLC” бугунги кунда илғор технологиялар асосида юқори сифатли фармацевтик маҳсулотларни ишлаб чиқариш ва бутун дунё бўйлаб етказиб бериш билан шуғулланади.

Музокаралар чоғи дастлаб агентлик директорининг ўринбосари араб томонини Фармацевтика тармоғини ривожлантириш агентлигининг фаолияти ҳамда юртимиз фармацевтика саноатининг инвестицион жозибадорлиги, хусусан, “Tashkent Pharma Park” инновацион илмий-ишлаб чиқариш фармацевтика кластери ҳамда эркин иқтисодий зоналарда сармоядорларга яратилган имкониятлар ва бериладиган имтиёзлар билан таништирди.

“Acino” директори ҳам ўз навбатида мазкур компаниянинг жаҳондаги етакчи фарммаҳсулотлар ишлаб чиқарувчилар билан ҳамкорлик қилиши, ҳозирда Лотин Америкаси, Африка, Туркия каби кўплаб давлатларда фаолият олиб бориши ҳақида гапирди ҳамда Ўзбекистонда инвестицион лойиҳани амалга ошириш учун маркетинг таҳлиллари ўтказаётганини маълум қилди.

Учрашув якунига кўра томонлар ўзаро ҳамкорлик алоқаларини ривожлантиришга келишиб олишди.

Фармацевтика тармоғини ривожлантириш
агентлиги Матбуот хизмати