USAID ва агентлик ўртасида 2019 йилда PQM Plus – “Дори воситалари сифатини ошириш” дастурини амалга оширишда ҳамкорлик қилиш борасида англашув меморандуми имзоланган эди. Мазкур меморандумда кўзланган натижаларга эришиш учун қатор соҳаларда ҳамкорликда иш олиб боришга келишилган бўлиб, мазкур ҳамкорлик доирасида USAID вакиллари агентликнинг қатор бошқармалари ходимлари билан учрашди.

Хусусан, 19 сентябрь куни “Зарур амалиётлар маркази” ДУК вакиллари билан бўлган учрашувда стандарт операцион жараёнлар масаласи, сифатни бошқариш тизимини тўлиқ ишлаб чиқиш, жорий этиш тамойиллари, техник хизмат кўрсатиш масалалари муҳокама қилинди.

20 сентябрь куни Лицензиялаш ва назорат қилиш бошқармаси ходимлари, шунингдек GMP инспекторлари билан мавжуд тизимдаги вазият, ариза топшириш ва лицензиялаш жараёнлари, сифатда нуқсонлар аниқланиши ва лицензия қайтариб олиниши масалаларида суҳбат ўтказилиб, инспекторлар томонидан  ўтказилган сўнгги инспекциялар натижалари таҳлил қилинди.

21 сентябрь куни мураббий Жири Холи томонидан аттестация ва валидация масалалариага бағишланган ўқув курси ўтказилди.

Учрашувларнинг сўнгги кунида, яъни 22 сентябрь санасида Фармацевтик инспекция вакиллари билан Фарминспекциялар ҳамкорлиги тизими PIC/S индикаторлари (бу борадаги қонунчилик, инспекция жараёнлари, инспекторлар, уларни ўқитиш, лабораторияларга кира олиш, сифат нуқсонлари) муҳокама қилинди.

Шу куннинг ўзида агентлик раҳбарияти ҳам USAID вакиллари билан учрашиб ечимини топиши керак бўлган масалалар ва ҳамкорлик истиқболлари борасида музокаралар олиб борди.

Фармацевтика тармоғини ривожлантириш
агентлиги Матбуот хизмати