Екатеринбург шаҳрида бўлиб ўтаётган "Иннопром" халқаро кўргазмасининг учинчи кунида Фармацевтика тармоғини ривожлантириш агентлиги вакиллари Свердловск региони Экспортни қўллаб-қувватлаш маркази раҳбари ўринбосари Трофимова Софья Aндреевна билан Ўзбекистон ва Свердловск региони ўртасидаги алоқаларни яхшилаш, Ўзбекистонда ишлаб чиқариладиган фармацевтика маҳсулотларини регионга экспорт килишни йўлга қўйиш буйича музокаралар олиб борди ва мавжуд эҳтиёжларни ва имкониятларни ўрганиш бўйича бирга ишлаш юзасидан келишиб олишди.

Шунингдек, кўргазмада иштирок этаётган Фармацевтика тармоғини ривожлантириш агентлиги вакилларининг хабар беришича, Россиянинг Курган вилояти губернатори ўринбосари билан икки томон тадбиркорлари ўртасида алоқаларни йўлга қўйиш бўйича ўзаро келишиб олинди. Ушбу музокаралар доирасида губернатор ўринбосари масалани чуқурроқ ўрганиш ҳамда шартномалар ва келишувларни имзолаш мақсадида Курган регионида жорий йилнинг август ойида бўлиб ўтадиган кўргазмада иштирок этишга таклиф қилди. 

Дунёнинг 22 мамлакатидан ташриф буюрган нуфузли ишлаб чиқарувчи компаниялар иштирок этаётган мазкур халқаро кўргазма бугун ўз ишини якунлайди.

Эслатиб ўтамиз, жорий йилнинг 5-7 апрель кунлари Тошкент шаҳрида илк маротаба “ИННОПРОМ: Ўзбекистонда катта саноат ҳафталиги” халқаро саноат кўргазмаси бўлиб ўтган эди.