Жорий йилнинг 16 август куни Корея Республикаси Чун-Aнг университетининг Иқтисодий тадқиқотлар институти вакиллари Фармацевтика тармоғини ривожлантириш агентлигига ташриф буюришди.

Учрашув чоғида Агентлик директорининг ўринбосари Жамшид Эшмуратов меҳмонларга ташриф учун миннатдорчилик билдириб, кореялик мутахассислар билан фармацевтика соҳасидаги ўзаро ҳамкорлик истиқболлари ҳақида гапирди. Тадбир доирасида хорижий университет билан янги таълим лойиҳаларини яратиш, Ўзбекистонда женьшень етиштириш имкониятларини ўрганиш, хорижий тадқиқот усуллари ва клиник синовларини таҳлил қилиш ва амалиётга татбиқ этиш масалалари муҳокама қилинди.

Меҳмонлар, янги ташкил этилаётган “Tashkent Pharma Park” фармацевтика кластери ва унинг ҳудудида жойлашган янги Фармацевтика техника университетига қизиқиш билдиришди.

Ўз ўрнида директор ўринбосари хориж мутахассисларини ушбу кластер майдони, унда яратилаётган эко ҳудуд, янги университет фаолияти ва унга алоқадор бўлган тадбирлар, таълим тизими ва кадрлар салоҳияти билан таништирди.

Учрашув якунига кўра томонлар ўзаро ҳамкорликни янаям кенгайтириш ва бу борада ахборот алмашиш хусусида келишиб олдилар.

Фармацевтика тармоғини ривожлантириш
агентлиги Матбуот хизмати