Хабарингиз бор, Ўзбекистон Республикаси Президенти 2019 йил 10 апрелда имзолаган “2019 – 2021 йилларда республиканинг фармацевтика тармоғини янада жадал ривожлантириш чора-тадбирлари тўғрисида”ги  Фармонида 2022 йилнинг январь ойига қадар барча маҳаллий ишлаб чиқарувчи корхоналар “Яхши ишлаб чиқариш амалиёти” (GMP) талабларига мувофиқлик бўйича сертификатлаштирилиши лозимлиги белгиланган.

Бугунги кунда дори воситалари ишлаб чиқарувчи маҳаллий корхоналар томонидан зарур ишлаб чиқариш амалиёти талабларини жорий этилганликни баҳолаш юзасидан аудит ўтказилиши бўйича бир нечта корхоналар томонидан мурожаатлар йўлланган.

Куни кеча эса Фармацевтика тармоғини ривожлантириш агентлигида “RADIKS” маъсулияти чекланган жамият фармацевтика корхонаси раҳбари Абдуғофур Каримовга зарур ишлаб чиқариш амалиёти GMP талабларига мувофиқлик сертификати тақдим этилди.  

Фармацевтика тармоғини ривожлантириш агентлигининг Халқаро стандартларни жорий этишни мувофиқлаштириш  бошқармаси бошлиғи Фарохат Ташматованинг сўзларига кўра, МЧЖ “RADIKS” корхонаси томонидан келиб тушган аризага мувофиқ Агентлик ҳузуридаги Дори воситалари, тиббий буюмлар ва тиббий техника экспертизаси ва стандартлаштириш давлат маркази ишчи органи тегишли фармацевтик инспекция ўтказган ва ўша даврда олинган маълумотлар асосида корхона GMP талабларига мувофиқлик сертификатига лойиқлиги топилган.

—