Фармацевтика тармоғини ривожлантириш агентлигида видеоконференц алоқа шаклида йиғилиш ташкил этилди. Унда 50 дан ортиқ маҳаллий ишлаб чиқарувчилар ва худудий бўлинма ходимлари иштирок этди.

Агентликнинг биринчи ўринбосари Улуғбек Эгамов бошлигида ўтказилган йиғилишда тармоқни янаям ривожлантириш борасидаги долзарб масалалар атрофлича муҳокама қилинди.  Жумладан, Инвестиция ва иашқи савдо вазирлиги маъсул ходимлари иштирокида агентлик томонидан коперация биржаларида яратилган имкониятлар билан таништирилди ва маҳаллий ишлаб чиқарувчиларни биржалар ишида ўз маҳсулотлари билан фаол иштирок этишга чақирилди. Хусусан, шу кунларда Тошкентда ўтказилаётган республика коперация биржасида қатнашаётган маҳаллий ишлаб чиқарувчилар ва уларнинг маҳсулотлари ҳақида айтиб ўтилди.

Шунингдек, ишлаб чиқариш ҳажмлари тушиб кетган корхоналар, (Жўрабек, Ремеди Групп, Мерримед Фарм ва Узгермедфарм) билан юзага келган бу салбий ҳолатнинг сабаблари, муаммо ва ечимлари борасида фикр алмашилди.

Йиғилишда, шунингдек, Агентликнинг биринчи ўринбосари У.Эгамов сўзга чиқиб, маҳаллий ишлаб чиқарувчилар маҳсулотининг экспортини ошириш мақсадида Агентликнинг Инвестиция ва ташқи савдо вазирлиги билан ҳамкорликда олиб бораётган ишлари тўғрисида гапириб берди. Хусусан, Қозоғистон ва Беларусия давлатлари билан дори воситалари ва тиббий буюмларни рўйхатдан ўтказишда ўзаро келишувга эришилаётганлиги таъкидланди.

Бундан ташқари, экспортни географиясини кенгайтириш, янги бозорларни ўзлаштириш мақсадида Ўзбекистон Республикаси Бош вазири ўринбосарининг 09.06.2022 йилдаги 24/17-17-сон буйруғига асосан Фармацевтика тармоғини ривожлантириш агентлиги делегациясининг Жанубий Африка Республикасининг Йоханнесбург шаҳрига хизмат сафари доирасида амалга оширилган ишлар билан таништирилди.

Таъкидлаш жоизки, жорий йилнинг 26-28 октябрь кунлари маҳаллий фармацевтика корхоналари билан биргаликда Агентлик делегацияси Жанубий Африка Республикасининг Йоханнесбург шаҳрида ўтказилган “AFRICA HEALTH 2022” халқаро тиббиёт ва фармацевтика кўргазмасида илк бор иштирок этди. Кейинги пайтда Африка давлатларида фармацевтика маҳсулотларини ишлаб чиқарувчи корхоналар сони етарли эмаслиги туфайли континет бозорида дори воситалари ва тиббиёт жиҳозлари кескин танқислиги  кузатилмоқда. Шу боис Африка қитъасида фармацевтика йўналишида улкан салоҳият, яъни бозорни ўзлаштириш имконияти мавжудлиги аниқланди ва бу йўналишда мунтазам равишда ишлаб олиб борилиши мақсадга мувофиқлиги таъкидлаб ўтилди.

Шунингдек, У. Эгамов Агентликнинг Марокаш ва Эфиопия давлатларига қилган бизнес-миссиялари ҳақида гапириб берди.

Шундан сўнг, йиғилиш қатнашчилари иштирокида музокара бўлиб ўтди. Хусусан, “Жўрабек Лабораторис” МЧЖ ҚК корхонаси вакили Агентлик томонидан кўрсатилаётган амалий кўмак учун миннатдорчилик билдирди. У, шунингдек, ишлаб чиқариш жараёнида фойдаланиладиган полиэтилен ва полипропилен хомашёсига бўлган 10% лик акциз солиғини бекор қилишни ёки маҳаллий ишлаб чиқарувчилартомонидан ушбу хомашёни фармацевтика талабларига кўра ишлаб чиқаришни таклиф этди. “OPTIMA SOBIRJON” МЧЖ вакили ўтган йили Белорусияга экспорт қилинган маҳсулотларга тўлов бўйича қарздорликни ундириш юзасидан илтимос билан сўзга чиқди. Бундан ташқари, йиғилишда бугунги кунда маҳсулотларни чет давлатларда рўйхатдан ўтказиш, клиниколди ва клиник синовлар, корхоналарнинг GMP стандартларини давлатлар ўртасида ўзаро тан олиш йўли билан соддалаштиришга оид фикр ва таклифлари билдирилди.

Фармацевтика тармоғини ривожлантириш
агентлиги Матбуот хизмати