O‘zbekistonda joriy etilgan karantin cheklovlari joriy yilning 15 avgustiga qadar uzaytirildi
Karantin cheklovlari amal qiladigan davrda quyidagilarga qatʼiy etibor qaratish belgilandi:
a) davlat organlari va tashkilotlariga:
➖ xodimlarini xatlovdan o‘tkazgan holda, ish joyiga faqatgina zarur bo‘lgan mutaxassislarni bevosita jalb etishga ruxsat berilganini inobatga olib, qolgan xodimlarni qonunchilikda belgilangan tartibda mehnat taʼtiliga chiqarishni yoxud masofadan turib (onlayn) ishlashini tashkil etishga to‘liq rioya etilishini taʼminlash;
➖ xodimlarini vaqtinchalik xizmat safariga yuborishni to‘xtatish;
➖ yig‘ilishlarni faqatgina onlayn tarzida tashkil etish;
➖ xodimlar orasida koronavirus bilan kasallanganlar mavjud bo‘lgan taqdirda, ulardan xabar olish, davolanish maqsadida zarur dori vositalari va buyumlarni xarid qilish uchun xodimning sharoitini inobatga olgan holda, moddiy yordam ajratish;
b) fuqarolarga:
➖ to‘y, oilaviy marosimlar va boshqa tadbirlarni o‘tkazmaslik;
➖ jamoat joylarida, ko‘cha, maydon va mahallalarda uch kishidan ortiq to‘planmaslik, qatʼiy ijtimoiy masofani saqlash (2 metr), tibbiy niqoblar va shaxsiy himoya vositalaridan foydalanish;
➖ yoshi katta va muayyan turdagi kasalligi (qandli diabet, metobolik sindromlari, autoimun kasalliklari, qon, yurak, tomir kasalliklari, onkologik kasalliklar va b.) mavjud fuqarolarga koronavirus kasalligi kuchli taʼsir ko‘rsatishini inobatga olib, 65 yoshdan oshgan fuqarolarni “o‘zini o‘zi yakkalash” hayot tarziga qatʼiy rioya etish hamda sababsiz uydan tashqariga chiqmaslik tavsiya etildi.
Quyidagi faoliyat turlarini to‘xtatish bo‘yicha cheklov joriy yilning 15 avgustiga qadar uzaytirildi:
➖ parklar va istirohat bog‘laridagi attraksionlar;
➖ buyum bozorlari va buyumlar savdosi bilan shug‘ullanuvchi yirik do‘konlar;
➖ sport zallari, fitnes klub, trenajer, basseynlar;
➖ umumiy ovqatlanish obyektlari (restoran, kafe, oshxona, choyxona);
➖ maktabgacha taʼlim tashkilotlari, o‘quv kurslari va har qanday to‘garaklar;
➖ sanatoriylar (koronovirus infeksiyasidan davolangan va reabilitatsiya o‘tayotgan bemorlarga tibbiy yordam tashkil etiladigan sanatoriylardan tashqari), pansionatlar, bolalar oromgohlari, xostellar, mehmon uylari, plyajlar va boshqa dam olish maskanlari;
➖ sartaroshxona va go‘zallik salonlari;
➖ Qoraqalpog‘iston Respublikasi, viloyatlar va Toshkent shahriga avtotransport vositalari, shu jumladan, yo‘nalishsiz taksilarning kirishi va chiqishi (viloyatlararo qatnov) (Toshkent shahridan Toshkent viloyatiga hamda Toshkent viloyatidan Toshkent shahriga kirib-chiqish bundan mustasno).
Farmatsevtika tarmog‘ini rivojlantirish agentligi Matbuot xizmati
