Dori vositalarini ishlab chiqaruvchi barcha mahalliy korxonalar 2024 yil 1 yanvarga qadar “Zarur ishlab chiqarish amaliyoti - GMP” O‘zbekiston Respublikasi Davlat standarti talablarini joriy qilishi zarur!

Bugungi kunda respublikada dori vositalarini ishlab chiqaruvchi mahalliy korxonalar soni 92 tani tashkil etib, ularning 26 tasida, jami 99 ta ishlab chiqarish liniyalarida “Zarur ishlab chiqarish amaliyoti - GMP” O‘zbekiston Respublikasi Davlat standarti talablari joriy qilingan.

O‘zbekiston Respublikasi Prezidentining tegishli Farmoni (PF-55 21.01.2022)ga muvofiq, 2022 yil 1 apreldan farmatsevtika sohasida yangi ishlab chiqaruvchi korxonalar GMP talablariga muvofiq ravishda tashkil etilishi ko‘zda tutilgan bo‘lib, faoliyat yuritib kelayotgan korxonalar uchun GMP talablariga muvofiq majburiy sertifikatlash muddatlari co‘nggi marotaba 2024 yil 1 yanvargacha uzaytirildi.

Shu bilan birga, 2023 yil 1 yanvardan farmatsevtika mahsulotlari bo‘yicha davlat xaridlarida faqatgina GMP asosida dori vositalarini ishlab chiqarishni tashkil etgan tashkilotlar qatnashishiga ruxsat berilishi belgilandi.

Taʼkidlash joiz, O‘zbekiston Respublikasi Prezidentining topshirig‘iga muvofiq, joriy yilning 12 aprelidan boshlab rasmiylashtirilgan xujjatlar asosida, 2022 yil yakuniga qadar mahalliy korxonalarning GMP sertifikatini birinchi marotaba olish bilan bog‘liq xarajatlari Farmatsevtika tarmog‘ini rivojlantirish agentligi tomonidan qoplab berilishi ko‘zda tutildi.

Qonunchilikka kiritilgan o‘zgartirishlarga (VMQ-80 21.02.2022) muvofiq, endilikda dori vositalarini ishlab chiqaruvchi mahalliy korxonalar o‘z faoliyatini GMP davlat standarti talablariga muvofiq tashkil etishi kerakligi belgilandi.

Shuningdek, 2024 yil 1 yanvargacha mahalliy korxonalar tomonidan belgilangan tartibda GMP davlat standarti joriy etilmagan taqdirda, mazkur holat litsenziya talab va shartlari buzilishi hisoblanib, farmatsevtika faoliyati uchun berilgan litsenziyaning amal qilishini to‘xtatib qo‘yish yoki bekor qilish uchun asos bo‘lishi haqida eslatib o‘tmoqchimiz.

Maʼlumot uchun, GMP talablarini joriy qilishning asosiy yutuqlari nimalardan iborat?

GMP talablarini joriy qilish - bu aholini sifatli, xavfsiz va bezarar dori vositalari bilan taʼminlash, ishlab chiqarish korxonalari hodimlari o‘zlariga yuklatilgan vazifalarni o‘z vaqtida sifatli bajarishini, farmatsevtika mahsulotlari xavfsizligiga ishonchni hujjatlar bilan tasdiqlanishini, korxonalarda xalqaro talablarga javob beradigan sifat tizimini yaratilishini, mahalliy maxsulotlarni raqobatbardoshligini hamda chet el davlatlariga eksport qilinishi uchun keng yo‘l ochib berilishini taʼminlashdir.

Yuqoridagilardan kelib chiqib, Farmatsevtika tarmog‘ini rivojlantirish agentligi dori vositalarini ishlab chiqaruvchi mahalliy korxonalarni o‘z ish faoliyatida GMP talablarini joriy etish va modernizatsiya ishlarini olib borish bo‘yicha loyihalarni ishlab chiqish hamda o‘rnatilgan muddatlar ichida amalga oshirishga chaqirib qoladi va bu masalada amaliy yordam berishga tayyor ekanligini maʼlum qiladi.

Farmatsevtika tarmog‘ini rivojlantirish agentligida GMP talablarini joriy etish bo‘yicha loyihalarni ishlab chiqishga, yuzaga kelayotgan savol va muammolarni hal etishga ko‘maklashish maqsadida doimiy faoliyat yurituvchi Ishchi guruh tuzilgan bo‘lib, ular bilan quyida keltirilgan raqamlar orqali bog‘lanishingiz mumkin:

Jurʼat Gulyamov – (+99871) 203-30-32/192
Dildora Usmanova – (+99871) 203-30-32/156
Xusniddin Anvarov – (+99871) 203-30-32/157
Farrux Shavkatov – (+99871) 203-30-32/153

Farmatsevtika tarmog‘ini rivojlantirish
agentligi Matbuot xizmati