Farg‘ona shahrining “Samo” sport majmuasida bugun 9 iyun kuni “Hududiy tarmoqlararo sanoat yarmarkasi” o‘z ishini boshladi.

Farmatsevtika, qurilish materiallari, yengil sanoat, avtomobilsozlik, elektrotexnika sohasi korxonalari ishtirokida o‘tkazilayotgan mazkur yarmarkada Farmatsevtika tarmog‘ini rivojlantirish agentligi mutasaddilari va farmatsevtik mahsulotlarni ishlab chiqaruvchi tarmoq korxonalari vakillari ham ishtirok etishmoqda.

Yirik va kichik biznes korxonalari o‘rtasida ichki va tarmoqlararo sanoat kooperatsiyasini yana-da kengaytirish maqsadida o‘tkazilayotgan mazkur tadbirning tantanali ochilish marosimidan so‘ng Farmatsevtika tarmog‘ini rivojlantirish agentligi direktorining o‘rinbosari Jamshid Eshmuradov “Farmatsevtika tarmog‘ini rivojlantirish istiqbollari” mavzusida taqdimot qilib o‘tdi.

Yarmarka davomida yirik sanoat va hududiy korxonalar bilan yangi turdagi mahsulotlarni sanoat kooperatsiyasi asosida mahalliylashtirish bo‘yicha kelishuvlarga erishish, shuningdek farmatsevtika tarmog‘i korxonalari tomonidan mahsulot xarid qilish bo‘yicha biitmlar tuzilishi, import o‘rnini bosuvchi mahsulotlar ishlab chiqarish istagini bildirgan kichik biznes va xususiy tadbirkorlik subyektlari bilan texnik jihatdan hamkorlik qilish memorandumlarining imzolanishi rejalashtirilmoqda.

Farmatsevtika tarmog‘ini rivojlantirish
agentligi Matbuot xizmati