Farmatsevtik inspeksiya nima degani? Va nimalar farmatsevtik inspeksiyadan o‘tkaziladi?

Javob: Vazirlar Mahkamasining 2019 yil 18 sentyabrdagi 788-son qaroriga ko‘ra:

Farmatsevtik inspeksiya - Zarur amaliyotlar (GxP) talablari yuzasidan sertifikatlashtirish yoki inspeksiya nazoratini amalga oshirish maqsadida o‘tkaziladi.

Inspeksiya nazorati (GxP) sertifikat taqdim etilgandan so‘ng sertifikatning amal qilish muddatida belgilangan talablarga muvofiqligini tasdiqlash maqsadida ishchi organ* tomonidan yiliga kamida 1 marotaba o‘tkaziladi.

(*ishchi organ — O‘zbekiston Respublikasi Sog‘liqni saqlash vazirligi huzuridagi Farmatsevtika tarmog‘ini rivojlantirish agentligining Dori vositalari, tibbiy buyumlar va tibbiy texnika ekspertizasi va standartlashtirish davlat markazi)

O‘zbekiston Respublikasida quyidagilar farmatsevtik inspeksiyadan o‘tkaziladi:

☑️ barcha mahalliy dori vositalari ishlab chiqaruvchilar Zarur ishlab chiqarish amaliyotining milliy talablariga muvofiq;

☑️ O‘zbekiston Respublikasi Sog‘liqni saqlash vazirligining klinik tadqiqotlar o‘tkazuvchi barcha klinik bazalari Zarur klinika amaliyoti (GCP) milliy talablariga muvofiq;

☑️ farmatsevtika mahsulotlarining klinik-oldi tadqiqotlarini amalga oshiruvchi barcha laboratoriyalar Zarur laboratoriya amaliyotining (GLP) milliy talablariga muvofiq;

☑️ farmatsevtika mahsulotlarini ulgurji sotish bilan shug‘ullanuvchi barcha mahalliy korxonalar Zarur distribyutorlik amaliyotining (GDP) milliy talablariga muvofiq.

Farmatsevtik inspeksiyalarni o‘tkazish bilan bog‘liq ishlarga haq to‘lash natijalaridan qatʼi nazar, ariza beruvchi tomonidan qonun hujjatlariga belgilangan tartibda amalga oshiriladi.

Farmatsevtika tarmog‘ini rivojlantirish
agentligi Matbuot xizmati