Joriy yilning 8 aprel kuni  Farmatsevtika tarmog‘ini rivojlantirish agentligining Litsenziyalash va nazoart qilish boshqarmasi boshlig‘i  Gulnora Zufarova va boshqarma bosh mutaxassisi Olimxo‘ja Akbarov Samarqand viloyatiga tashrif buyurib, viloyatda faoliyat yuritayotgan dori vositalari va tibbiy buyumlarni  ishlab chiqarish, dori vositalari va tibbiy buyumlarni ulgurji realizatsiya qilish huquqiga ega jami 55 ta tadbirkorlik subyektlari ishtirokida seminar-yig‘ilish o‘tkazdilar.

Yig‘ilishda O‘zbekiston Respublikasi Prezidentining 2020 yil 24 avgustdagi "Litsenziyalash va ruxsat berish tartib-taomillarini tubdan takomillashtirish chora-tadbirlari to‘g‘risida" PF-6044 Farmoni ijrosi bo‘yicha qonunchilikdagi o‘zgarishlar to‘g‘risidagi, Tadbirkorlik subyektlari faoliyatini davlat tomonidan nazorat qilish to‘g‘risidagi yangi  qonun loyihasi to‘g‘risidagi to‘liq maʼlumotlar yig‘ilish ishtirokchilari eʼtiboriga yetkazildi.

Shu bilan birga, tadbirkorlik subyektlari o‘rtasida olib borilayotgan profilaktik tadbirlarga qaramasdan, litsenziyalash va nazorat qilish boshqarmasiga sifatsiz, kontrafakt farmatsevtik mahsulotlar ishlab chiqarilayotganligi va realizatsiya qilinayotganligi to‘g‘risida jismoniy va yuridik shaxslardan maʼlumotlar kelib tushayotganligi, bundan tashqari huquqni muhofaza qiluvchi organlar tomonidan ham bunday mahsulotlar aniqlanib muomaladan chiqarilganligi to‘g‘risida maʼlum qilib,  2020 yil 4 – chorak va 2021 yil 1-chorakda jismoniy va yuridik shaxslardan kelib tushgan shunday murojaatlarga binoan belgilangan tartibda o‘tkazilgan tekshiruvlar va ko‘rilgan taʼsir choralar to‘g‘risida aytib o‘tdi.

Bundan tashqari, O‘zbekiston Respublikasi Prezidentining 2019 yil 10 apreldagi «2019-2021 yillarda respublikaning farmatsevtika tarmog‘ini yana-da jadal rivojlantirish chora-tadbirlari to‘g‘risida» PF-5707-son Farmoni 4-bandiga asosan 2022 yilning 1 yanvariga qadar Farmatsevtika mahsulotlarini ishlab chiqaruvchi barcha mahalliy korxonalar «Zarur ishlab chiqarish amaliyoti - GMP» milliy talablariga muvofiq, Farmatsevtika mahsulotlarini ulgurji sotish bilan shug‘ullanuvchi barcha mahalliy korxonalar «Zarur distribyutorlik amaliyoti-GDP» milliy standarti talablariga muvofiq majburiy sertifikatlashtirilishi zarur ekanligi belgilanganligi va mazkur qonun hujjati talabiga rioya etmaslik 2022 yil 1 yanvardan boshlab litsenziya talabini buzilishi xolati deb baholanishi mumkinligi haqida litsenziatlar ogohlantirildi.

Seminar so‘ngida yig‘ilish qatnashchilari tomonidan berilgan savollarga mutaxassislar tomonidan tegishli javoblar berildi.

Farmatsevtika tarmog‘ini rivojlantirish
agentligi Matbuot xizmati