Endilikda safsarguldoshlar oilasiga mansub tuganak piyozli o‘simlik Piskent tumanida ham yetishtirilmoqda. «Turon Bizness Limited» masʼuliyati cheklangan jamiyati jahon bozorida yuqori baholanadigan zaʼfaron (shafran) o‘simligini yetishtirish faoliyatini yo‘lga qo‘ygan.

Savdo-sanoat palatasi Axborot xizmatining maʼlumot berishicha, tuman hokimligining tegishli qaroriga ko‘ra, 2018 yilda mazkur korxonaga shafran dorivor o‘simligini yetishtirish uchun 14,2 gektar yer maydoni ajratilgan. Loyihaga ko‘ra 2019 yilda mazkur o‘simlik urug‘i Afg‘oniston davlatidan tajriba tariqasida O‘zbekiston hududiga olib kelingan. Hozirgi kunda hududdagi 4 gektar yer maydonda mazkur o‘simlik yetishtirib kelinmoqda. Afg‘oniston bilan hamkorlikda amalga oshirilayotgan mazkur loyihaning umumiy qiymati 1 million 400 ming dollarni tashkil etgan hamda to‘g‘ridan-to‘g‘ri xorijiy investitsiya kiritilishi hisobiga amalga oshirilmoqda.

Faqatgina qo‘l mehnatini talab qiladigan bu o‘simlik oktyabr-noyabr oylarida ochiladi. Hozir uning ayni gullagan payti.

Har gektaridan 2 kg (1 kg. – 8-10 ming AQSH dollari bahosida) hosil olinib, tadbirkor tomonidan Turkiya va Eronga eksport qilish uchun shartnomalar imzolangan. O‘simlik yetishtirish hajmi ortgach, ushbu dorivor o‘simlikni Eron, Pokiston, Armaniston, Germaniya va Saudiya Arabistoni davlatlariga eksport qilish rejalashtirilgan. Ushbu loyihada 40 ta doimiy ish o‘rni yaratilgan. Loyiha hajmi kengaytirilgach, korxonada qo‘shimcha 200 ta mavsumiy ish o‘rni tashkil etilishi ko‘zda tutilgan.

—