Farmatsevtika tarmog‘ini rivojlantirish agentligining Litsenziyalash va nazorat qilish boshqarmasi tomonidan Sirdaryo viloyati tibbiyot muassasalari ichki dorixonalarida o‘tkazilgan tekshiruvlarda faoliyatni litsenziyasiz noqonuniy amalga oshirilgan holatlar aniqlandi.

Sog‘liqni saqlash vazirligi huzuridagi Farmatsevtika tarmog‘ini rivojlantirish Agentligining Litsenziyalash va nazorat qilish boshqarmasi tomonidan 2021 yil II-IV choraklarda farmatsevtika faoliyati bilan shug‘ullanuvchi davlat tibbiyot muassasalari dorixonalarining litsenziya talab va shartlariga rioya etishlarini nazorat qilish bo‘yicha  o‘tkaziladigan tekshirishlar reja-jadvaliga muvofiq, 2021 yil 28-29 iyun kunlari  Sirdaryo  viloyati ko‘p tarmoqli tibbiyot markazi, Respublika Shoshilinch tibbiy yordam ilmiy markazining Sirdaryo viloyat filiali, Sirdaryo tuman tibbiyot birlashmasi, Guliston shahar tibbiyot birlashmasi ichki tekshirish ishlari o‘tkazildi.

Tekshiruvlarda ayrim tibbiyot muassasalari litsenziyalarining amal qilish muddati tugaganligiga qaramay dori vositalarini tayyorlash faoliyatini litsenziyasiz noqonuniy ravishda amalga oshirganliklari, shuningdek dorixonalarda dori vositalarini saqlash sharoitlari buzilganligi kabi qonunbuzilish holatlari aniqlanib, ularga nisbatan tegishli taʼsir choralari belgilandi.

Shu bilan birga, Shu bilan birga, litsenziya talablarini buzilish holatlarini oldini olishga qaratilgan profilaktik tadbirlar doirasida Sirdaryo viloyatida faoliyat yuritayotgan dori vositalarinini tayyorlash, dori vositalari va tibbiy buyumlarni  ishlab chiqarish, dori vositalari va tibbiy buyumlarni ulgurji realizatsiya qilish huquqiga ega jami 27 ta litsenziatlar va tadbirkorlar  ishtirokida seminar-yig‘ilish o‘tkazildi.

Seminarda litsenziatlar eʼtiboriga farmatsevtika sohasidagi yangi qabul qilingan qonunchilik hujjatlari, ularning mazmun mohiyati to‘g‘risida maʼlumot berish bilan birga, litsenziyalash va nazorat qilish boshqarmasi tomonidan amalga oshirilayotgan, sifatsiz, kontrafakt farmatsevtik mahsulotlar aylanmasiga barxam berishga qaratilgan ishlar haqida axbort berildi.

Xususan, jismoniy va yuridik shaxslardan kelib tushgan murojaatlar asosida litsenziatlarda o‘tkazilgan tekshiruvlar va ko‘rilgan taʼsir choralar ular eʼtiboriga yetkazilib,  dori vositalari muomalasida sifatsiz, kontrafakt farmatsevtik mahsulotlar aylanmasiga yo‘l qo‘ymaslik to‘g‘risida litsenziyatlar ogohlikka chaqirildi.

Shuningdek,O‘zbekiston Respublikasi Prezidentining 2019 yil 10 apreldagi «2019-2021 yillarda respublikaning farmatsevtika tarmog‘ini yana-da jadal rivojlantirish chora-tadbirlari to‘g‘risida» PF-5707-son Farmoni 4-bandiga asosan 2022 yilning 1 yanvariga qadar Farmatsevtika mahsulotlarini ishlab chiqaruvchi barcha mahalliy korxonalar «Zarur ishlab chiqarish amaliyoti - GMP» milliy talablariga muvofiq, Farmatsevtika mahsulotlarini ulgurji sotish bilan shug‘ullanuvchi barcha mahalliy korxonalar «Zarur distribyutorlik amaliyoti-GDP» milliy standarti talablariga muvofiq majburiy sertifikatlashtirilishi zarur ekanligi belgilanganligi va mazkur qonun hujjati talabiga rioya etmaslik 2022 yil 1 yanvardan boshlab litsenziya talabini buzilishi holati deb baholanishi mumkinligi haqida litsenziatlar ogohlantirildi.

Seminar so‘ngida yig‘ilish qatnashchilari tomonidan berilgan savollarga mutaxassislar tomonidan tegishli javoblar berildi.

Farmatsevtika tarmog‘ini rivojlantirish agentligi
Litsenziyalash va nazorat qilish boshqarmasi